Igbo Mass Readings for June 2 2023, Fraịde n’ime Izuụka nke Asatọ N’Oge Adanyeghị n’Emume.

Nke a bụ Igbo Mass Readings for June 2 2023, Fraịde n’ime Izuụka nke Asatọ N’Oge Adanyeghị n’Emume.

IHE ỌGỤGỤ NKE MBỤ – 44:1, 9-13

Ihe Ọgụgụ e wetara n’akwụkwọ Sịrak

Ugbu a, ka anyị toonụ ndị ahụ aha ha na-ada ụda, ndị nna anyị ha n’agbụrụ ha. E nwere ụfọdụ ndịọzọ ahapụghị ihe ncheta. Aha ha furu nke na ọ dịka o nweghị mgbe a mụrụ mọbụ mgbe ha biri n’ụwa.

Otu ahụ ka ọ dịkwa ụmụ ha. Mana ndị a bụ ndị obiebere; ndị eziomume ha enweghị nchefu. Agamniihu ha nwere ga-esi n’aka ha fere n’aka ụmụụmụ ha.

Oke ha ga-esikwa n’ụmụ fere n’ụmụ. Ụmụ ha kwụsịrị ike n’ọgbụgbandụ ndị ahụ; n’ihi ha, ụmụụmụ ha sokwara otu ụzọ ahụ. Mkpụrụ ha ga-adịrị gaba ebighịebi, otito ha adịghị nhichapụ.

ABỤỌMA NA AZỊZA – Ps. 149:1-2,3-4,5-6,9

Azịza: Onyenweanyị nwere ịhụnaanya n’ebe ndị nke ya nọ.

1. Kwerenụ Onyenweanyị ukwe ọhụrụ,

ka ọgbakọ ndị kwere na ya kweere ya ukwe otito.

Ka Izrel ñụrịa n’ihi onye kere ya,

ka ụmụ Zayọn ñụrịa n’ihi onyeeze ha. Azịza

2. Ka ha were ịgba egwu too aha ya,

ka ha were ịgba na ụbọ akwara gbaara ya egwu.

N’ihina Onyenweanyị nwere ịhụnaanya n’ebe ndị nke ya nọ,

O kpubela ndị umeala okpu nke mmeri. Azịza

3. Ka ndị nke ya ñụrịa na mmeri ha.

Ka ha daa n’ala n’ihu Chineke, na-eto ya oge niile.

Ka nnukwu ukwe otito Chineke jupụta n’ọnụ ha.

Nke a bụ otito nke ndị nke ya kwere ekwe. Alleluia. Azịza

MBEKU

Alleluia, Alleluia:

Onyenweanyị, okwu gị bụ mmụọ bụrụkwa ndụ. Ọ bụ gịnwa ji okwu nke ndụ ebeebe.

Alleluia.

OZIỌMA – 11:11-26

Ihe Ọgụgụ nke a si n’Oziọma dị asọ nke Mak dere

Mgbe Jesu banyere na Jerusalem, ọ gara n’ime ụlọnsọ legharịa anya otu ihe niile dị. Ma ebe ọ bụ na chi ejibela, ya na ndị ụmụazụ ya iri na abụọ pụrụ gaba Betani. N’echi ya, mgbe ha si na Betani na-alaghachi na Jerusalem agụụ jikwa Jesu.

Ka ọ nọ ebe dị anya, ọ hụrụ otu osisi fiig nke jupụtara n’akwụkwọ ndụ. Ọ gara ileta ma o nwere mkpụrụ ọ ga-ahụ n’elu ya. Ma mgbe o ruru ya nso, ọ hụghị mkpụrụ ọbụla n’elu ya karịa akwụkwọ ndụ, n’ihina ọ bụghị oge osisi fiig ji amị mkpụrụ.

Jesu bụrụ osisi ahụ ọnụ sị “Ka onye ọbụla ghara irikwa mkpụrụ gị ọzọ” Ndị na-eso ụzọ ya nụkwara nke a. Mgbe ha bịaruru Jerusalem, ọ banyere n’ụlọnsọ, bido chụpụba ndị na-ere na ndị na-azụ ahịa na ya. O kpudoro okpokoro ndị na-agbanwo ego na oche ndị na-ere nduru ihu n’ala.

O kweghịkwa ka onye ọbụla buru ihe site n’ụlọnsọ gafee. Ọ kụziri ha sị, “Ọ bụ na e deghị ya n’Akwụkwọ Nsọ: A ga-akpọ ụlọ m ụlọ ekpere maka mba niile? Ma ụnụ emeela ya ọgbakọ ndị ohi”. Mgbe ndịisi nchụaja na ndị odeakwụkwọ nụrụ nke a, ha chọrọ ụzọ ha ga-esi gbuo ya.

Ma ụjọ na-atụ ha, n’ihina nkụzi ya tụrụ igwe mmadụ ahụ n’anya. Mgbe uhuruchi bịara ha siri n’obodo ahụ pụọ. N’ụtụtụ ya, mgbe ha na-aga n’ụzọ; ha hụrụ na osisi fiig ahụ Jesu bụrụ ọnụ akpọnwụọla ruo na mgbọrọgwu ya.

Pita chetere ihe merenụ, wee sị Jesu, “Onyenkuzi, lee osisi fiig ahụ ị bụrụ ọnụ akpọnwụọla”. Jesu zara ha sị, “Nweenụ okwukwe na Chineke.

N’ịgwa ụnụ eziokwu, onye ọbụla nke ga-asị ugwu a, ‘Si ebe a pụọ, danye n’ime osimiri na enweghị obi abụọ, kwesịkwaa ike na ihe o kwuru ga-eme, a ga emezuru ya ọchịchọ ya.

N’ihina agwa m ụnụ, ihe ọbụla ụnụ rịọrọ n’ekpere, ma kwere na ụnụ enwetala ya, ọ ga-abụ nke ụnụ. Mgbe ọbụla ụnụ kwụ na-ekpe ekpere, gbagharanụ onye ọbụla mehiere ụnụ, ka Nna ụnụ nke bi n’eluigwe werekwa gbaghara ụnụ mmehie ụnụ niile. Ma ọ bụrụ na ụnụ agbagharaghị mmadụ ibe ụnụ, Nna ụnụ nke bi n’eluigwe agaghịkwa agbaghara ụnụ.

Igbo Mass Readings for June 2 2023, Fraịde n’ime Izuụka nke Asatọ N’Oge Adanyeghị n’Emume.