Igbo Mass Readings for April 19 2024, Fraịde Izuụka nke Atọ n’oge Mbilite n’Ọnwụ Kristi

Nke a bụ Igbo Mass Readings for April 19 2024, Fraịde Izuụka nke Atọ n’oge Mbilite n’Ọnwụ Kristi.

IHE ỌGỤGỤ NKE MBỤ – 9:1-20

Ihe Ọgụgụ ewetara n’Ọrụ Ndịozi

Ugbu a, Sọl ka nọ na-aba mba na ọ ga-egbu ndị na-eso ụzọ Onyenweanyị. Ọ gakwuuru onyeisi nchụaja rịọ ya ka o denye ya akwụkwọ maka ụlọ nzukọ ndị Juu nọ na Damaskọs, ka o wee nwee ike ịkpụrụ ụmụnwoke na ụmụnwaanyị niile ọ ga-ahụ na-eso ụzọ ahụ, kpụga Jerusalem.

Ka ọ na-abịaru Damaskọs nso, oke amụma gburu, ihè dị egwu achakwasị ya. Ọ dara n’ala, nụ otu olu ka ọ na-asị ya, “Sọl! Sọl! Gịnị mere iji ebuso m agha?” Sọl ajụọ sị, “Onye ka ị bụ Onyenweanyị?”

Ọ zaghachiri sị, “Abụ m Jesu, onye Ị na-ebuso agha! Bilie banye n’ime obodo ebe a ga-agwa gị ihe ị ga-eme.” Ihe a riri ndị ha na Sọl so aga ọnụ. Ha nụrụ olu ahụ ma ha ahụghị onye kwuru ya.

Sọl si n’ala bilie, saghee anya ya, o nweghịkwa ike ịhụ ihe ọbụla. N’ihi nke a, ha sekpụụrụ ya n’aka dubata ya na Damaskọs. Ọ hụghị ụzọ ụbọchị atọ. O righị ihe ọbụla nke ọ na-añụ ihe ọñụñụ.

E nwere otu onye na-eso ụzọ Jesu bi na Damaskọs a na-akpọ Ananịyas. Onyenweanyị kpọrọ ya oku n’ọhụ sị, “Ananịyas!” Ọ zaa ya sị, “Lee m, Onyenwe m!”

Onyenweanyị sịrị ya, “Bilie gaa n’ama ahụ a na-akpọ ‘Ụzọ kwụ ọtọ’. Ị garuo jụọ n’ụlọ nwoke a na-akpọ Judas, maka otu nwoke onye Tasọs, aha ya bụ Sọl. Ọ nọ ebe ahụ ugbu a na-ekpe ekpere, ọ hụrụ ọhụ ebe otu nwoke a na-akpọ Ananịyas batara, bikwasa ya aka n’isi ka ọ hụbakwa ụzọ.’

Ananịyas zara sị, “Onyenweanyị, ọtụtụ mmadụ akọọrọla m ọtụtụ ihe maka nwoke a banyere ihe ọjọọ na arụrụala ọ rụrụ n’ebe ndị nsọ gị na Jerusalem nọ.

Ugbu a, ọ natara ike n’aka ndịisi nchụaja iji jide ndị niile na-akpọku aha gị.” Onyenweanyị zara ya sị, “Gaba! N’ihi na ahọpụtala ya ka ọ bụrụ ngwaọrụ m, onye ga-ebugara mba ndị amaghị Chineke, ndịeze na ụmụ Izrel aha m.

Aga m egosi ya na ọ ga-atarịrị ahụhụ n’ihi aha m. Ananịyas gabara banye n’ụlọ ahụ, bikwasa Sọl aka n’isi sị, “Sọl, nwanne m! Onyenweanyị Jesu onye mere ka ị hụ ya anya n’ụzọ i si bịa, zitere m ka m mee ka ị hụkwa ụzọ ọzọ, jupụtakwa na Mmụọ Nsọ.”

Ozigbo ahụ ihe dịka mkpekere azụ siri ya n’anya dapụ. Ọ hụbakwa ụzọ ọzọ, o bilizie mee ya mmirichukwu. O rie nri, nwetakwa ume. Sọl nọnyere ndị na-eso ụzọ Jesu ụbọchị olemaole na Damaskọs.

N’atụfughị oge, ọ gagharịrị n’ụlọ nzukọ niile nke ndị Juu na-ekwusa maka Jesu, na-asị, “Ọ bụ Nwa nke Chineke.

ABỤỌMA NA AZỊZA – Ps. 117:1, 2.

Azịza: Gaanụ na mba niile, kwusabanụ oziọma.

1. Toonụ Onyenweanyị, mba niile,

Toonụ ya, ndị mmadụ niile. Azịza

2. N’ihi na ịhụnaanya ya siri ike,

nkwụdosiike ya na-adị ọkpụ. Azịza

MBEKU

ALLELUIA ALLELUIA:

Kristi ebiliela ma chakwasịkwa anyị, ndị oji ọbara ya wee gbapụta.

ALLELUIA.

OZIỌMA – 6:52-59.

Ihe Ọgụgụ ewetara n’Oziọma dị asọ nke Jọn dere.

Ndị Juu malitere ịrụrịta ụka n’etiti onwe ha na-asị: “Olee otu nwoke a ga-esi nye anyị ahụ ya ka anyị rie?” Jesu wee sị ha, “Ọ bụrụ na ụnụ erighị ahụ nwa nke mmadụ, Ọ bụrụkwa na ụnụ añụghị ọbara ya, ụnụ agaghị enwe ndụ n’ime ụnụ.

Onye na-eri ahụ m na-añụkwa ọbara m nwere ndụ ebeebe. Aga m akpọlite ya n’ọnwụ n’ụbọchị ikpeazụ. N’ihi na ahụ m bụ nri n’ezie, ọbara m bụkwa ihe ọñụñụ n’ezie.

Onye ọbụla nke na-eri ahụ m, nke na-añụkwa ọbara m, na-anọgide n’ime m, mụ onwe m n’ime ya. Dịka Nna ahụ dị ndụ siri zite m, m site na ya na-adị ndụ, otu ahụ ka onye na-eri m ga-esite na m na-adị ndụ.

Nke a bụ nri ahụ nke si n’eluigwe rịdata. Ọ bụghị ụdị nri ahụ nke nna ụnụ ha riri ma nwụọ. Kama onye na-eri nri a ga-adị ndụ ruo mgbe ebighịebi.” Jesu kwuru ihe ndị a n’ụlọ nzukọ mgbe ọ na-akuzi ihe na Kapanaum.

Igbo Mass readings for April 20 2024, Satọde Izuụka nke Atọ n’oge Mbilite n’Ọnwụ Kristi.

Igbo Mass Readings for April 19 2024, Fraịde Izuụka nke Atọ n’oge Mbilite n’Ọnwụ Kristi.

Catholic Sunday and Daily Mass Readings for 2024 (Kindle eBook & Paperback)

X
Scroll to Top
error: Alert: Content is protected !!

Receive Daily Mass Readings and Reflections via Email

You have successfully subscribed to the newsletter

There was an error while trying to send your request. Please try again.

Catholic Lectionary will use the information you provide on this form to be in touch with you and to provide updates and marketing.