Igbo Mass Readings for September 5 2025, Fraịde n’ime Izuụka nke Iri Abụọ na Abụọ N’Oge Adanyeghị n’Emume.

Nke a bụ Igbo Mass Readings for September 5 2025, Fraịde n’ime Izuụka nke Iri Abụọ na Abụọ N’Oge Adanyeghị n’Emume.

IHE ỌGỤGỤ NKE MBỤ – 1:15-20

Ihe Ọgụgụ e wetara n’akwụkwọozi Pọl degaara Ndị Kolosi

Kristi bụ onyinyo nke Chineke a dịghị ahụ anya, bụrụkwa onye mbụ a mụrụ n’ihe niile e kere eke. N’ihina n’ime ya ka e kere ihe niile, ma ndị dị n’eluigwe ma ndị dị n’ụwa, ndị a na-ahụ anya na ndị a naghị ahụ anya; ma ocheeze niile, ike niile, ike nke mmụọ niile na ike ọchịchị niile.

Ọ bụ maka ya na site na ya ka e jiri kee ihe niile. Ya onwe ya nọkwa tupu ekee ihe niile. Ọ bụkwa n’ime ya ka ihe niile na-ejikọta n’otu. Ọ bụ ya bụ isi nzukọ bụ ahụ ya.

Ọ bụkwa isi mbido na onye mbụ si na ndị nwụrụ anwụ pụta, ka o wee bụrụ onye isi n’ihe niile. N’ihina ọ bụ n’ime ya ka ọ masịrị ozuzuoke nke Chineke ibiri.

Ọ bụkwa site na ya ka Chineke si kpeziere onwe ya na ihe niile e kere eke, ma n’elu ụwa ma n’eluigwe. O sitekwara n’ọbara nke ọ gbara n’elu obe na-eme udo.

ABỤỌMA NA AZỊZA – Ps. 100: 1, 2, 3, 4, 5

Azịza: Werenụ iti mkpu ọñụ bịa n’ihu nke Onyenweanyị

1. Ụwa niile tijerenụ Onyenweanyị mkpu ọñụ

Werenụ iti mkpu ọñụ bịa n’ihu ya. Azịza.

2. Maranụ na Onyenweanyị bụ Chineke,

Ya kere anyị, ọ bụkwa ya nwe anyị,

Anyị bụ ndị nke ya; anyị bụkwa igwe atụrụ ya. Azịza

3. Werenụ ekele baa n’ọnụụzọ ama ya niile,

Werenụ otito baa n’ogige ya niile;

Kelenụ ya, gọziekwanụ aha ya. Azịza.

4..N’ihina Onyenweanyị dị mma,

Ịhụnaanya ya na-adị ebeebe,

Ntụkwasịobi ya na-adịgide         

bido na-ndụdụgandụ ruo na ndụdụgandụ. Azịza.

MBEKU – Ps. 130:5

Alleluia, Alleluia:

Ana m eche Onyenweanyị, na nkwa ya ka m nwere nchekwube.

Alleluia.

OZIỌMA – 5:33-39

Ihe Ọgụgụ nke a si n’Oziọma dị asọ nke Luk dere

Ụfọdụ mmadụ sịrị Jesu, “Ndị na-eso ụzọ Jọn na-ebu ọnụ ọtụtụ mgbe na-ekpe ekpere, otu a ka ndị na-eso ụzọ ndị Farisii na-emekwa, ma ndị nke gị nọ na-eri na-añụ.”

Jesu zara ha sị, “Ụnụ nwere ike ime ka ndị a kpọrọ n’oriri ọlụlụ nwunye bụọ ọnụ mgbe ha na onye na-alụ nwaanyị ọhụrụ nọ?

Oge na-abịa mgbe a ga-anapụ ha onye na-alụ nwunye ọhụrụ, mgbe ahụ ka ha ga-ebube ọnụ.” Jesu tụkwaara ha ilu sị, “Onweghị onye na-adọkara iberibe akwa ọhụrụ dụkwasa ya na nke ochie; e mee nke a, a ga-adọka nke ọhụrụ, iberibe akwa ọhụrụ ahụ agaghị amakọ n’akwa ochie.

O nweghị onye na-agbanye mmanya ọhụrụ n’ime udu akpụkpọ ochie, o mee otu a, mmanya ahụ ga-agbawa udu akpụkpọ ahụ, ha abụọ alaa n’iyi. Kama a ga-etinye mmanya ọhụrụ n’ime udu ọhụrụ.

O nweghị onye ọbụla ñụchara mmanya ochie na-enwe mmasị ịñụ nke ọhụrụ n’ihina ọ na-asị, Nke ochie dị mma.”

Igbo Mass Readings for September 5 2025, Fraịde n’ime Izuụka nke Iri Abụọ na Abụọ N’Oge Adanyeghị n’Emume.