Igbo Mass Readings for February 18 2028, Fraịde n’ime Izuụka nke Isii N’Oge Adanyeghị n’Emume.

Nke a bụ Igbo Mass Readings for February 18 2028, Fraịde n’ime Izuụka nke Isii N’Oge Adanyeghị n’Emume.

IHE ỌGỤGỤ NKE MBỤ – 2:14-24, 26

Ihe Ọgụgụ ewetara n’Akwụkwọozi Jemis

Ụmụnna m, Uru gịnị ka ọ baara mmadụ ịsị: Enwere m okwukwe! Ma okwukwe ahụ apụtaghị ihe n’ọrụ ya? Okwukwe dị otu a ọ pụrụ ịzọpụta ya?

Mba! Ọ bụrụ na otu nwanne anyị nwoke mọbụ nwanne anyị nwaanyị yi nkịrịnka akwa, ọ bụrụkwa na o nweghị ihe oriri ga-ezuru ya n’ụbọchị, otu onye n’ime ụnụ asị ya: Gaa nke ọma!

Kpuchikwaa onwe gị nke ọma! Rijukwaa afọ! n’enyeghị ya ihe dị mkpa maka ahụ ya, uru gịnị ka ọ bara? N’otu aka ahụ okwukwe na-enweghị ezi ọrụ nwụrụ anwụ n’onwe ya.

E leghị anya otu onye ga-asị: Gị onwe gị nwere okwukwe, mụ onwe m nwere ọrụ. Ọsịsa m bụ nke a: Gosị m ihe bụ okwukwe gị ma e wepụ ọrụ gị?

Aga m egosị gị okwukwe m site n’ọrụ m! I kwere na Chukwu bụ naanị otu? I mere nke ọma! Ọ bụladị ndị mmụọ ọjọọ kwere, wee kụja, makwaa jijiji n’ihi egwu.

Gị onye nzuzu! Ị na-eche ka mmadụ gwa gị agwa n’okwukwe na-enweghị ezi ọrụ bụ ihe abaghị uru ọbụla? Ọ bụ na nna anyị Abraham abụghị onye a gụrụ n’onye eziomume site n’ọrụ ya mgbe o jiri otu nwa ya bụ Aịzik chụọ aja n’ekwu nchụja?

Ụnụ ahụghị na okwukwe ya na ọrụ ya soro rụkọọ ọrụ n’otu? E sitekwara n’ọrụ ya mee ka okwukwe ya zuo oke. N’ụzọ dị otu a e mezuola ihe e dere n’Akwụkwọ Nsọ sị Abraham kwere na Chineke.

Chineke gụrụ ya onye eziomume n’ihi okwukwe ya. N’ihi nke a a kpọrọ ya enyi Chineke. Nke a ga-egosị ụnụ na Chineke na-esite n’ọrụ mmadụ gụọ ya onye eziomume ọ bụghị site naanị n’okwukwe ya.

Ya bụ otu ahụ si bụrụ ihe nwụrụ anwụ ma ọ bụrụ na mmụọ adịghị ya, etu ahụ ka okwukwe si bụrụ ihe nwụrụ anwụ ma ọ bụrụ na ọrụ adịghị ya.

ABỤỌMA NA AZỊZA – Ps. 112:1-2, 3-4, 5-6

Azịza: Añụrị na-adịrị ndị ji ọñụ na-edebe iwu nke Onyenweanyị

1. Alleluia! Añụrị na-adịrị onye na-atụrụ Onyenweanyị egwu,

onye ji ọñụ na-edebe iwu ya!

Ụmụ onye dị otu a ga-abụ ndị nwere ike n’ụwa,

agbụrụ onye ezigbo omume ga-enweta ngọzi. Azịza

2. Ezinụụlọ ya ga-enweta akụnụụba,

eziomume ya agaghị enwe mgbanwe.

N’ihina onye ezigbo omume ga-achawapụta dịka ihe n’etiti ọchịchịrị

ọ dị ebere, n’ịhụnaanya na-akwụba aka ọtọ. Azịza

3. Ya bụ ezigbo mmadụ anaghị ana ọmụrụnwa ma o binye ego,

ọ bụ onye eziokwu n’ihe niile ọ na-eme.

Ebe eziomume chedoro ya, ọ na-enwe ịkwụdosike,

ọ na-ahapụ ncheta ga-adị ebeebe n’azụ ya. Azịza

MBEKU – Luk 8:15

Alleluia, Alleluia:

Añụrị ga adịrị ndị nụrụ okwu Chineke, were ikwesi ntụkwasịobi na obi dị mma jidesie ya ike, werekwa ndidi mịpụta mkpụrụ.

Alleluia.

OZIỌMA – 8:34-9:1

Ihe Ọgụgụ nke a si n’Oziọma dị asọ nke Mak dere

Jesu kpọkọtara igwe mmadụ ahụ na ndị na-eso ụzọ ya sị ha, “Ọ bụrụ na onye ọbụla na-achọ iso m, ya jụ onwe ya, buru obe ya sobe m n’azụ.

N’ihina onye ọbụla nke na-achọ ichekwaba ndụ ya ga-atufu ya; ma onye ọbụla nke ga-atufu ndụ ya n’ihi m na n’ihi oziọma, ga-azọpụta ya. Uru gịnị ka ọ ga-abaara mmadụ ma o ritechaa akụnụụba niile nke ụwa a, ma tụfuo ndụ ya?

Gịnị ka mmadụ ga-eji kwụghachi ụgwọ ndụ ya? N’ihina onye ọbụla mụ onwe m na okwu m na-eme ihere n’ọgbọ nke a, na-eme ihe ọjọọ na-akwakwa iko, ihere onye ahụ ga-emekwa Nwa nke mmadụ mgbe ọ ga-abịa n’ebube nke Nna ya, ya na ndị mmụọọma ya dị nsọ”

Ọ sịrị ha, “N’ịgwa ụnụ eziokwu, o nwere ụfọdụ n’ime ndị guzoro n’ebe a na-agaghị anwụ ọnwụ ruo mgbe ha ga-ahụ ọchịchị nke Chineke ka ọ bịara n’ike”.

Igbo Mass Readings for February 18 2028, Fraịde n’ime Izuụka nke Isii N’Oge Adanyeghị n’Emume.