Igbo Mass Readings for February 14 2024, Wenezde Ntụ
Nke a bụ Igbo Mass Readings maka February 14 2024, Wenezde Ntụ.
IHE ỌGỤGỤ NKE MBỤ – 2:12-18
Ihe Ọgụgụ e wetara n’Akwụkwọ onye Amụma Joel
Isi Okwu: Gbawaanụ obi ụnụ; ụnụ adọwakwala uwe ụnụ.
Ọ bụ Onyenweanyị na-ekwu nke a: Ugbu a, ugbu a, werenụ obi ụnụ niile chegharịa lọghachi azụ n’ebe M nọ. Werenụ ibu ọnụ na ịkwa akwa na ịgba mkpe lọghachikwute M ugbu a.
Dọwaanụ obi ụnụ. Ụnụ adọwakwala akwa ụnụ. Tụgharịanụ chee Chineke ụnụ ihu ọzọ, n’ihi na ọ bụ onye obi ọma bụrụkwa onye obi ebere. Ọ naghị ewe iwe ngwa ngwa.
Obi ọma ya ebuka. Ọ dịkwa njikere ịtụgharị obi mee ebere. Onye ma, ma ọ bụ na Ọ gaghị atụgharịkwa obi ọzọ bịakwa mee ebere? E leghị anyị. Ọ ga-enye anyị ngọzi mgbe Ọ na-agafe ebe anyị na-achụnyere Onyenweanyị Chineke aja, na-enyekwa Ya onyinye.
Fụọ opi ike na Zayọn! Tie iwu ka e buo ọnụ. Kpọọ nnukwu ọgbakọ dị ebube. Kpọkọta ndị mmadụ ọnụ. Kpọọ ọha obodo oku. Kpọkọtachaa ndị okenye.
Kpọkọtachakwa ụmụ ntakịrị niile, ma ndị e ku n’aka, ma ndị na-añụ ara. Ka nwokorobịa lụrụ nwunye ọhụrụ si n’ime ụlọ ya pụta. Ka nwunye a lụrụ ọhụrụ sikwa n’ebe ndina ya pụta.
Ka ndị Ụkọchukwu, bụ ndị e chiri echi maka ịgbara Onyenweanyị odibo, site n’ọnụ ụzọ ụlọ ụka bere akwa ruo n’ebe nchụaja, na-asị: “Biko Onyenweanyị, e gbula ndị nke Gị!
E kwela ka agbụrụ Ị họtara ahọta ghọọ ihe mba ndị ọzọ ji akpa ọchị. E kwela ka ihere megbuo ndị nke Gị. N’ihi gịnị ka ndị mba ọzọ ga-eji ajụ sị: “Olee kwanụ Chineke ha?” Mgbe ahụ ka Onyenweanyị, Onye nwere anya ukwu maka ala nke Ya, ga-emere ndị nke Ya ebere.
ABỤỌMA NA AZỊZA YA – 50:3-6, 12-14. 17 Az. 3
Azịza: Biko Onyenweanyị, meere anyị ebere n’ihi na anyị emeela njọ.
1. Chineke m, were obi ọma Gị meere m ebere,
were obi ebere Gị hichapụ njọ m niile.
Biko sachapụ m mmehie m.
Ghụchaa m njọ m. Azịza
2. N’ezie, amaara m mmehie m.
Njọ m niile guzoro m n’ihu mgbe niile.
Emehiela m Gị. Sọ Gị ka m mehiere.
Emeela m ihe rụrụ arụ n’ihu Gị. Azịza
3. Chineke m, kenye m obi dị ọcha.
Tinye mmụọ kwụdosiri ike n’ime m.
Achụpụkwala m n’ihu Gị.
A napụkwala m mmụọ Gị dị asọ. Azịza
4. Nyekwa m añụrị nke enyemaka Gị.
Were mmụọ nke obi na-anụ ọkụ kwalite m.
Onyenwe m, meghee egbugbere ọnụ m.
Ka ire m wee kwusaa otito Gị. Azịza.
IHE ỌGỤGỤ NKE ABỤỌ – 5:20-6:2
Ihe Ọgụgụ e wetara n’Akwụkwọozi nke Abụọ Pọl dị asọ degaara ndị Kọrịnt
Isi Okwu: Meenụ ka ụnụ na Chineke kpezie. Ugbu a bụ oge amara.
Anyị bụ ndị ozi na ndị nnọchite anya Kristi. A gara asị na Chineke si n’ọnụ anyị na-akpọ ụmụ mmadụ. Ya mere, anyị na-arịọ ụnụ n’aha Kristi, ka ụnụ na Chineke kpezie, dị n’udo.
N’ihi na ọ bụ maka anyị ka Chineke jiri mee Onye ahụ na-emeghị njọ ọ bụla ka O buru njọ. O mere nke a iji mee ka anyị bụrụ ndị ezi omume nke Chineke n’ime Kristi.
Ma, ebe anyị na Chineke na-arụkọ ọrụ, anyị na-arịọkwa ụnụ ọzọ ka ụnụ ghara ikwe ka amara Chineke ụnụ natara laa n’iyii. N’ihi na Chineke kwuru sị: N’oge dị mma anụrụ M olu ụnụ. N’ụbọchị nzọpụta, abịara M nyere ụnụ aka. Lee, ugbu a, bụ oge ahụ dị mma. Taa bụ ụbọchị nzọpụta ahụ.
MBEKU – Abụọma 50:12.14
(Enwere ike ịhọrọ otu n’ime mbeku ndị a n’ụbọchị nkịtị ọ bụla nọ n’Oge Ncheta Ahụhụ Kristi) N’oge Ncheta Ahụhụ Kristi tupu a gụọ mbeku ma ọ bụ mgbe a gụchara mbeku, e nwere ike ikwu nke ọ bụla n’ihe ndị a.
(a) Kristi, Eze dị ebube ruo mgbe ebighị ebi, otito dịrị Gị.
(b) Onyenweanyị Jesu, otito na ebube dịrị Gị.
(c) Kristi, ebube dịrị Gị. Ị bụ Okwu nke Chineke.
1. Chineke m, kenye m obi dị ọcha. Nyekwa m añụrị nke enyemaka Gị.
Abụọma 94:8
2. Ụnụ agbachikwala obi ụnụ taa. Ma geenụ ntị n’olu nke Onyenweanyị.
OZIỌMA – 6:1-6, 16-18.
Ihe Ọgụgụ nke a si n’Oziọma dị asọ nke Matiu dere.
Isi Okwu: Nna ụnụ, Onye na-ahụ ihe a na-eme na nzuzo ga-akwụ ụnụ ụgwọ.
Jesu gwara ụmụazụ Ya, sị: “kpacharanụ anya ka ụnụ ghara ịrụ ọrụ eziomume ụnụ n’ihu mmadụ, naanị ka ha hụ, wee too ụnụ. Ọ bụrụ na ụnụ emee otu a, Nna ụnụ nke eluigwe agaghị akwụ ụnụ ụgwọ ọrụ.
“Ya mere, mgbe ọ bụla Ị na-enye onyinye ebere, a fụla opi, dị ka ndị ihu abụọ si eme, n’ụlọ nzukọ ha, na n’okporo ụzọ niile. Ha na-eme otu a, ka ndị mmadụ hụ, wee too ha.
N’ịgwa ụnụ ezi okwu: Ha enwezuola ụdị ụgwọ ọrụ kwesịrị ha. Ya mere, mgbe ọ bụla Ị na-enye onyinye ebere, e kwela ka aka ekpe gị mata ihe aka nri gị na-eme.
Kama mee ka ọ bụrụ onyinye I nyere na nzuzo. Nna gị Onye na-ahụ na nzuzo ga-akwụghachi gị ụgwọ ọrụ. “Mgbe ọ bụla ụnụ na-ekpe ekpere, ụnụ emekwala ka ndị ihu abụọ, ndị ọ na-amasị ịkwụrụ ọtọ n’ime ụlọ nzukọ na n’akụkụ okporo ụzọ, ka ndị mmadụ wee hụ ha.
N’ịgwa ụnụ ezi okwu: Ha enwezuola ụdị ụgwọ ọrụ kwesịrị ha. Ma mgbe ọ bụla ị na-ekpe ekpere, banye n’ime ime ụlọ gị, mechie ụzọ, wee kpeere Nna gị Onye dị na nzuzo.
Nna gị nke na-ahụ ihe na nzuzo ga-akwụghachi gị. “Ọzọ, mgbe ụnụ na-ebu ọnụ, ụnụ agbarụla ihu ụnụ, dị ka ndị ihu abụọ si eme. Ha na-agbarụ ihu ha, ka ha wee gosị ndị mmadụ na ha na-ebu ọnụ.
N’ịgwa ụnụ ezi okwu, ha enwezuola ụgwọ ọrụ kwesịrị ha. Ma, mgbe ị na-ebu ọnụ, tee isi gị ude, sakwaa ihu gị. Mee otu a, ka ndị mmadụ wee ghara ịma na ị na-ebu ọnụ. Naanị Nna gị Onye na-ahụ na nzuzo ga-ama na ị na-ebu ọnụ. Nna gị ahụ na-ahụ na nzuzo ga- akwụ gị ụgwọ ọrụ.
Igbo Mass readings for February 15 2024, Tọọzde na-eso Wednezde Ntụ.
Igbo Mass Readings for February 14 2024, Wenezde Ntụ.
