Igbo Mass Readings for April 17 2023, Mọnde n’ime Izuụka nke Abụọ n’oge Mbilite n’Ọnwụ Kristi

Nke a bụ Igbo Mass Readings for April 17 2023, Mọnde n’ime Izuụka nke Abụọ n’oge Mbilite n’Ọnwụ Kristi.

IHE ỌGỤGỤ NKE MBỤ – 4:23-31

Ihe Ọgụgụ ewetara n’Ọrụ Ndịozi

Mgbe ndị nzukọ ahụ hapụrụ Pita na Jọn ha gara kọọrọ ndị ụmụnna n’ime Kristi ihe ndịisi nchụaja na ndị okenye ndị Juu gwara ha. Mgbe ha nụrụ nke a ha ji otu olu kpeere Chineke, sị, “Onyenweanyị gị onye kere eluigwe na ụwa na oke osimiri na ihe niile nke dị ha n’ime, gị onye sitere n’ike Mmụọ Nsọ gị mee ka nwodibo gị bụ nna anyị Devid sị,

      “N’ihi gịnị ka mba niile ndị amaghị

       Chineke ji eme oke mkpọtụ,

       ndị niile bi n’ụwa ji nọdụ

       na-atụgharị uche n’ihe efu?”

Ndịeze nke ụwa jikeere onwe ha, ndịisi ọchịchị zukọkwara n’otu ebe imegide Onyenweanyị na onye o tere ude.” N’ime obodo a, ikwu eziokwu, Herọd na Pọntus Paịlet zukọrọ, ha na mba ndị ọzọ amaghị Chineke, na ndị Izrel imegide nwodibo gị dị nsọ bụ Jesu onye nke I tere ude.

Ha zukọrọ imezu ihe niile nke I sitere n’ike gị na uche nsọ gị nke I bu ụzọ kwuo na ha ga-emezu. Ugbu a Onyenweanyị, lee, hụkwa mba ha na-abara anyị.

Nye anyị bụ ụmụodibo gị ike iji gbasaa ozi gị n’atụghị egwu ọbụla. Setịa aka gị ịgwọ ọrịa niile, ma kwe ka e gosi ọtụtụ ihe ịrịbaama, ka a rụkwaa ọrụebube dị iche-iche site n’aha Onye Nsọ ahụ na-ejere gị ozi bụ Jesu.”

Mgbe ha kpechara ekpere, ụlọ ebe ha zukọrọ mara jijiji. Ha niile wee jupụta na Mmụọ Nsọ na-ekwu okwu Chineke n’atụghị egwu ọbụla.

ABỤỌMA NA AZỊZA – Ps. 2: 1-3, 4-6, 7-9.

Azịza: Añụrị ga-adịrị ndị tụkwasara obi ha na Dinwenụ.

1. Gịnị ka mba niile ji eme mkpọtụ.

Gịnị ka ndị ọgọ mmụọ ji ebu agha?

Ndịeze ụwa na-enupụ isi;

ndị ụmụeze na-akpa nkata ọjọọ,

na-emegide Yahweh na onye nke ya O tere ude.

Ha na-ekwu sị, “Ugbu a ka anyị kụjie mkpara igwe ha ji achị anyị,

ka anyị zọpụta onwe anyị n’aka ọchịchị ha.” Azịza

2. Mana onye ahụ ocheeze ya dị n’eluigwe;

nọ ala achị ọchị;

Onyenweanyị na-akwa ha emu,

Ma mgbe ahụ O ji iwe gwa ha okwu,

egwu ejide ha niile,

O kwuru sị, “Nke a bụ eze nke m kwụbara na Zayọn,

ugwu nke m dị nsọ.

Aga m ekwupụta iwu nke Onyenweanyị. Azịza

3. Onyenweanyị gwara m sị, ‘Ị bụ nwa m,

taata A bụrụla m Nna gị.

Rịọ m arịrịọ, aga m enye gị mba niile,

ka ha bụrụ ebe ọchịchị gị.

Ị ga-eji mkpara igwe kụwaa ha,

ma kụrichaa ha dịka ite onye ọkpụ ite. Azịza

MBEKU

ALLELUIA ALLELUIA:

Kristi bilitere n’ọnwụ, ma mee ihe niile ka ọ dị ọhụrụ, O gosila ebere ya n’ebe mmadụ nọ.

ALLELUIA.

OZIỌMA – 3: 1-8.

Ihe Ọgụgụ ewetara n’Oziọma dị asọ nke Jọn dere

O nwere otu nwoke n’ime ndi Farisii, aha ya bụ Nikọdemus, onye ọchịchị nke ndị Juu. Nwoke a bịakwutere Jesu n’otu abalị, sị ya, “Rabaị (onye nkuzi) anyị maara na ị bụ onye nkuzi sitere na Chineke.

N’ihina ọ dịghị onye nwere ike ịrụ ihe ịrịbaama ndị a Ị na-arụ, ma ọ bụrụ na Chineke  anọnyereghị ya.” Jesu zara ya sị, “Ana m agwa gị eziokwu, ọ bụrụ na amụgharịghị mmadụ ọzọ, ọ gaghị ahụ alaeze Chineke anya.”

Nikọdemus jụrụ ya sị, “Olee otu a ga-esi mụgharịa mmadụ mgbe o tozuru dimkpa? O nwere ike ịba nke ugboro abụọ n’afọ nne ya ka e wee mụgharịa ya ọzọ?” Jesu zara ya sị: “N’ịgwa gị eziokwu, ọ bụrụ na-ejighị mmiri na Mmụọ Nsọ mụgharịa mmadụ ọzọ, ọ pụghị ịba n’alaeze Chineke.

Ihe esi na-anụahụ mụọ bụ anụahụ, ma ihe amụrụ site na Mmụọ Nsọ bụ mmụọ. Ya atụla gị n’anya, na m sị, ‘A ga-amụgharịrị gị ọzọ’ Ifufe na-efe ebe ọbụla ọ sọrọ ya. Ị na-anụ mkpọtụ ya, ma Ị maghị ebe o si abịa na ebe ọ na-aga. Otu a ka ọ dị onye ọbụla amụrụ site na Mmụọ Nsọ.”

Igbo Mass readings for April 18 2023, Tuezde n’ime Izuụka nke Abụọ n’oge Mbilite n’Ọnwụ Kristi

Igbo Mass Readings for April 17 2023, Mọnde n’ime Izuụka nke Abụọ n’oge Mbilite n’Ọnwụ Kristi.