Igbo Mass Readings for June 30 2025, Mọnde n’ime Izuụka nke Iri na Atọ N’Oge Adanyeghị n’Emume.

Nke a bụ Igbo Mass Readings for June 30 2025, Mọnde n’ime Izuụka nke Iri na Atọ N’Oge Adanyeghị n’Emume.

IHE ỌGỤGỤ NKE MBỤ – 18:16-33

Ihe Ọgụgụ e wetara n’akwụkwọ Jenesis

Site ebe ahụ ụmụnwoke ndị ahụ zọpụrụ njem bịarute ebe obodo Sodọm pụtara ihe ile anya, Abraham sokwa ha na-egosi ha ụzọ.

N’oge ahụ Yahweh na-atụgharị n’echiechi ya sị, “Aga m ezonarị Abraham ihe a m gaje ime, ebe ọ bụ na Abraham ga-abụ otu nnukwu mba siri ike nke mba niile nọ n’elu ụwa ga-esi na ya enweta ngọzi?

N’ihina ahọpụtala m ya ka o duzie ụmụ ya ndị nwoke na ezinụụlọ ya, ndị ga-esochi ya ka ha dobe ụzọ nke Yahweh site n’ibi ndụ eziomume na ịkwụwa aka ọtọ.

Otu a ka Yahweh ga-eji mejupụta ihe o kwere Abraham na nkwa”. Yahweh wee sị, “Mkpu a na-eti gbasara Sodọm na Gomora dị ukwuu, njọ ha dịkwa ukwuu n’otu aka ahụ.

Aga m aga n’onwe m ka m mara ma omume ha ọ jọrọ njọ dịka mkpu a banyere ha si ru m ntị; ọ bụrụ na ọ dịghị otu ahụ, aga m ama”. Ụmụnwoke ndị ahụ hapụrụ ebe ahụ gaba Sodọm, ebe Abraham nọgidere n’ihu Yahweh.

Abraham gatụrụ n’ihu ya sị, “Ị ga-emebikodo ndị eziomume na ndị ajọomume ọnụ n’ezie? Ọ bụrụ na e nwere ndị eziomume iri mmadụ ise n’ime obodo ahụ. Ị ga emebi ya n’ezie?

Ọ bụ na ị gaghị azọpụta obodo ahụ n’ihi iri mmadụ ise ndị eziomume ahụ nọ n’ime ya? Echekwala ime ihe dị otu a: igbusị ndị eziomume na ndị ajọomume nke bụ ịkpaso ndị eziomume na ndị ajọomume otu agwa! Echekwala ihe dị otu a!

Ọ bụ na onye ọkaikpe nke ụwa niile agaghị enye ikpe nkwụmọtọ?” Yahweh zaghachiri sị, “Ọ bụrụ na m achọta iri mmadụ ise ndị eziomume n’obodo Sodọm, aga m ahapụ imebi obodo ahụ niile maka ihi ha”.

Abraham kwulitere ma sị, “Ọ bụ ịwa anya ka m ji agwa Onyenwe m okwu otu a, mụ, onye bụ aja na ntụ! Ọ bụrụkwanụ na e nweta ndị eziomume iri mmadụ anọ na ise, Ị ka ga-emebi obodo ahụ niile?”

Ọ zara sị, “Mba, agaghị m emebi ya ma ọ bụrụ na m chọta iri mmadụ anọ na ise ndị eziomume n’ime ya”. Abraham gbara isi akwara sị, “A sịkwanụ na e nweta iri mmadụ anọ n’ebe ahụ?

Ọ zara ya, “Agaghị m emebi ya, n’ihi iri mmadụ anọ ndị eziomume ahụ” Abraham sịrị, “Enwere m ntụkwasịobi na Onyenwe m agaghị ewe iwe, ma nye m ohere ka m kwuo ọzọ: Ọ bụrụkwanụ sọọsọ iri mmadụ atọ ka a ga-ahụ ebe ahụ?”

Ọ zara ya, “Agaghị m emebi ya, ma ọ bụrụ na m achọta iri mmadụ atọ ebe ahụ”. Ọ sịkwa, “Ọ bụ ịwa anya n’ebe m nọ ịgwa Onyenwe m okwu otu a, e leghị anya a ga-enweta sọọsọ iri mmadụ abụọ?”

Ọ zakwara sị, “Agaghị m emebi ya, n’ihi iri mmadụ abụọ ahụ”. Ọ sịkwa, “Enwere m ntụkwasịobi na Onyenwe m agaghị ewe iwe ọ bụrụ na m ekwuo otu okwu ọzọ!

Ọ bụrụkwanụ naanị mmadụ iri”. Ọ zara sị, Agaghị m emebi ya n’ihi mmadụ iri ahụ”. Oge ọ gwachara Abraham okwu, Yahweh pụwara, ma Abraham laghachiri n’ụlọ ya.

ABỤỌMA NA AZỊZA – Ps. 103:1-2, 3-4, 8-9, 10-11.

Azịza: Osebụrụwa dị ebere na ịhụnaanya.

1. Gọzie Onyenweanyị, mkpụrụobi m,

gọzie aha ya dị nsọ, ihe niile dị n’ime m!

Gọzie Onyenweanyị, mkpụrụobi m,

echezọkwla obi ebere ya niile. Azịza

2. Nke o ji gbaghara njọ gị niile,

ma gwọọ ọrịa gị niile,

nke o ji si n’olulu zọpụta ndụ gị

nke o ji were ịhụnaanya na obi ebere kpube gị okpueze. Azịza

3. Osebụrụwa dị ebere na ịhụnaanya,

ọ naghị ewe iwe ngwa ngwa, ịhụnaanya ya dị ukwuu,

iwe ya anaghị adị ebeebe,

ịkpọ asị ya na-adị sọ nwa ntịntị oge. Azịza

4. Ọ naghị emeso anyị dị ka njọ anyị si dị,

ọ naghị ata anyị ahụhụ dịka amamikpe anyị si dị.

Dịka eluigwe siri dị elu n’ebe ụwa dị,

otu ahụ ka ịhụnaanya ya siri dị ukwuu

n’ebe ndị na-atụrụ ya egwu nọ. Azịza

MBEKU – Ps. 95:8

Alleluia, Alleluịa:

Taa, ọ bụrụ na ụnụ anụ olu ya, ụnụ akpọchila obi ụnụ.

Alleluia.

OZIỌMA – 8:18-22

Ihe Ọgụgụ nke a si n’Oziọma dị asọ nke Matiu dere

Mgbe Jesu hụrụ na oke igwe mmadụ gbara ya gburugburu, Ọ gwara ha sị, “Ka anyị gafeenụ n’akụkụ nke ọzọ”.

Ma otu onye odeakwụkwọ bịakwutere ya sị ya, “Onye nkuzi, aga m eso gị ebe ọbụla ị na-aga”. Jesu zara ya sị, “Ufu nwere ọnụ ebe ha na-ebi, ụmụnnụnụ nwekwara akwụ ha, ma nwa nke mmadụ enweghị ebe ọ na-edobe isi ya”.

Otu onye ọzọ n’ime ndị na-eso ụzọ ya gwara ya sị, “Onyenweanyị ka m buru ụzọ gaa lie nna m”. Ma Jesu zara ya sị: “Sobe m, hapụ ndị nwụrụ anwụ ka ha lie onwe ha”.

Igbo Mass Readings for June 30 2025, Mọnde n’ime Izuụka nke Iri na Atọ N’Oge Adanyeghị n’Emume.