Igbo Mass Readings for June 8 2026, Mọnde Izuụka nke Iri N’Oge Adanyeghị n’Emume.
Nke a bụ Igbo Mass Readings for June 8 2026, Mọnde n’ime Izuụka nke Iri N’Oge Adanyeghị n’Emume.
IHE ỌGỤGỤ NKE MBỤ – 17:1-6
Ihe Ọgụgụ ewetara n’Akwụkwọ nke Mbụ nke Ndịeze
N’oge a Elaịja onye Tishbe nke nọ na Giled gwara Ahab sị, “Ka Yahweh Chineke nke Izrel dị ndụ, onye m na-efe, igirigi agaghị ada nke mmiri ga-ezo n’afọ ndị a na-abịanụ ma ọ bụrụ na m ekwugharịghị ya.”
Onwetere okwu nke Chineke nke sị, “Si ebe a bilie, chewe ihu n’ọwụwa anyanwụ, gaa zoo onwe gị n’akụkụ Kerit nke dị n’ọwụwa anyanwụ Jọdan.
Enyele m ụmụnnụnụ iwu ka ha na-ebutere gị nri, ebe ị ga na-añụ mmiri bụ nke iyi ntakịrị ahụ. O mere ka Chineke siri gwa ya. Ọ gara biri n’akụkụ Kerit, iyi ntakịrị ahụ dị n’ọwụwa anyanwụ Jọdan.
Ụmụnnụnụ na-ebutere ya achịcha na anụ, ụtụtụ na mgbede; ọ na-añụkwa mmiri iyi ntakịrị ahụ.
ABỤỌMA NA AZỊZA – Ps. 121: 1-2, 3-4, 5-6, 7-8
Azịza: Enyemaka anyị na-esi n’aka Onyenweanyị, onye mere eluigwe na ala
1. Ewelitere m anya m n’eluiigwu,
kedụ ebe enyemaka m ga-esi abịa?
Enyemaka m na-esi n’aka Onyenweanyị,
onye mere eluigwe na ala.
Azịza: Enyemaka anyị na-esi n’aka Onyenweanyị, onye mere eluigwe na ala
2. Ọ gaghị ekwe ka ihe ọbụla mee gị
n’ihina onye nche gị anaghị arahụ ụra.
Lee onye nche nke Izrel
anaghị ehi ụra nke ọ na-ekwo ụra.
Azịza: Enyemaka anyị na-esi n’aka Onyenweanyị, onye mere eluigwe na ala
3. Osebụrụwa bụ onye na-eche gị
Ọ nọ n’akụkụ gị na-echekwaba gị
Anyanwụ agaghị achagbu gị n’ehihie,
nke ọnwa na-etigbu gị n’abalị.
Azịza: Enyemaka anyị na-esi n’aka Onyenweanyị, onye mere eluigwe na ala
4. Osebụrụwa ga-echedo gị n’ihe ọjọọ niile
Ọ ga-echekwa ndụ gị.
Osebụrụwa ga-echedo ọpụpụ gị na mbata gị,
bido ugbu a ruo mgbe ebighịebi.
Azịza: Enyemaka anyị na-esi n’aka Onyenweanyị, onye mere eluigwe na ala
MBEKU – Matiu 4:14
Alleluia, Alleluia:
Ọ bụghị naanị site na nri ka mmadụ si adị ndụ, kama site n’okwu ọbụla nke si n’ọnụ Chineke pụta.
Alleluia.
OZIỌMA – 5:1-12
Ihe Ọgụgụ nke a si n’Oziọma dị asọ nke Matiu dere
Ka Jesu hụrụ igwe mmadụ ahụ, Ọ rịgooro n’elu ugwu. Mgbe ọ nọdụrụ ala, ndị na-eso ụzọ ya bịakwutere ya. Ọ malitere ịkụziri ha sị: “Ngọzi na-adịrị ndị dara ogbenye n’ime mmụọ, n’ihina alaeze eluigwe bụ nke ha.
Ngọzi na-adịrị ndị na-eru ụjụ, n’ihina a ga-akasi ha obi, Ngọzi na-adịrị ndị dị nwaayọ n’obi, n’ihina ha ga-eketa ụwa, Ngọzi na-adịrị ndị agụụ eziomume na-agụ, n’ihina a ga-enyeju ha afọ,
Ngọzi na-adịrị ndị obi ebere n’ihina a ga-emere ha ebere, Ngọzi na-adịrị ndị dị ọcha n’obi, n’ihina ha ga-ahụ Chineke anya, Ngọzi na-adịrị ndị na-achọ udo n’ihina a ga-akpọ ha ụmụ Chineke,
Ngọzi na-adịrị ndị niile a na-emegbu n’ihi eziomume, n’ihina alaeze eligwe bụ nke ha, Ngọzi na-adịrị ụnụ mgbe ndị mmadụ na-akọcha ụnụ, na-emegbu ụnụ, na-ekwukwa okwu asị ọjọọ niile dị icheiche megide ụnụ n’ihi m.
Ñụrịanụ ọñụ, nwekwaanụ obi ụtọ, n’ihina ụgwọ ọrụ ụnụ buru ibu n’eluigwe maka na otu a ka ha siri megide ndị amụma buru ụnụ ụzọ bịa.
Igbo Mass Readings for June 9 2026, Tuezde n’ime Izuụka nke Iri N’Oge Adanyeghị n’Emume.
Igbo Mass Readings for June 8 2026, Mọnde Izuụka nke Iri N’Oge Adanyeghị n’Emume.