Igbo Mass Readings for March 28 2024, Ncheta Oriri Ikpeazụ (Tọọzde)

Nke a bụ Igbo Mass Readings for March 28 2024, Ncheta Oriri Ikpeazụ (Tọọzde).

IHE ỌGỤGỤ NKE MBỤ – 12:1-8. 11-14

Ihe Ọgụgụ e wetara n’Akwụkwọ Ọpụpụ

Isi Okwu: lhe a ga-eme n’Oriri Ngabiga.

Chineke gwara Mosis na Erọn n’ala Ijipt sị ha: “Ọnwa nke a ga-abụrụ ụnụ ọnwa kachasị ibe ya, ọnwa mbụ n’afọ ụnụ. Gwanụ ọgbakọ ndị Izrel niile sị ha: ‘N’ụbọchị nke iri n’ọnwa nke a, onye ọ bụla ga-esi n’igwe atụrụ ya họpụta otu anụ maka otu ezi na ụlọ.

Ọ bụrụ na ndị bi n’otu ezi na ụlọ dị nta nke na ha agaghị ericha otu anụ, ha ga-esonyere ezi na ụlọ ndị agbata obi kara dị ha nso, dịka ọnụ ọgụgụ mmadụ siri dị. Ụnụ ga-amata nke ọma ihe onye ọ bụla pụrụ iri, ka e were mara otu ọnụ ọgụgụ ga-aha.

Ọ ga-abụ anụ na-ebughị ọrụ, bụrkwa oke anụ, dị otu afọ. O nwere ike ịbụ atụrụ ma ọ bụ ewu. Ụnụ ga-ahapụ ya ruo n’ụbọchị nke iri na anọ nke ọnwa a, oge ọgbakọ ndị Izrel ga-egbu ya tupu uhuruchi.

A ga-ewere ọbara ya tee na akụkụ ibo ọnụ ụzọ abụọ na n’elu ọnụ ụzọ nke ụlọ a ga-anọ rie oriri ahụ. N’anyasị ahụ ka a ga-eji ahịhịa na-elu ilu na achịcha na-ekoghị eko rie anụ ahụ a hụrụ n’ọkụ.

Otu a ka ụnụ ga-esi eri ya: ụnụ ga-eke eriri n’ukwu, gbara akpụkpọ ụkwụ n’ụkwụ, jide mkpara n’aka. Ụnụ ga-eri ya ọsọ ọsọ: N’ihi na ọ bụ Ngabiga nke Onyenweanyị.

Aga M agafe n’ala ljipt n’abalị ahụ, were na-egbusị diọkpara niile, ma nke mmadụ ma nke anụmanụ. Aga M ata arụsị niile nke ndị ljipt ahụhụ. Abụ M Dinwenụ! Ọbara e tere n’ụlọ ụnụ bụ na ya ga-abụ ihe ịrịba ama ebe ụnụ nọ!

Ọ bụrụ na M hụrụ ọbara ahụ, aga M agafe ụnụ. Otu a ụnụ ga-agbalaha nnukwu mbibi ahụ dị egwu ga-adakwasị obodo ljipt. Ụbọchị taa ga-abụrụ ụnụ ụbọchị ncheta, nke ụnụ ga-eji nnukwu mmemme a, were mee iji sọpụrụ Onyenweanyị na ndụdụgandụ ụnụ niile.

ABỤỌMA NA AZỊZA YA – 115:12-13, 15-18 Az. 1 Kọr. 10:16

Azịza: Iko dị nsọ anyị na-agọzi bụ oriri ọbara Kristi.

1. Kedụ ihe m ga-emere Onyenweanyị,

maka ihe ọma niile O meere m?

Aga m eburu iko nzọpụta,

were kpọkuo aha Onyenweanyị. Azịza

2. Ọnwụ ndị kwere na Ya,

dị oke ọnụ n’ebe Onyenweanyị nọ.

Nwa odibo Gị, Onyenweanyị!

Nwodibo Gị ka m bụ; Ị tọhapụla m n’agbụ. Azịza.

3. Onyenweanyị aga m ehunyere Gị onyinye ekele,

bịakwa kpọkuo aha Gị.

Aga m emezu nkwa m kwere Onyenweanyị,

n’ihu ndị nke Ya niile. Azịza

IHE ỌGỤGỤ NKE ABỤỌ – 11:23-26

Ihe Ọgụgụ e wetara n’Akwụkwọozi Mbụ Pọl dị asọ degaara ndị Kọrịnt

Isi Okwu: Oge ọ bụla ụnụ riri achịcha a, ñụọ iko a, ụnụ na-ekwupụta ọnwụ nke Onyenweanyị.

N’ihi na ihe ahụ m natara n’aka Onyenweanyị bụkwa ihe m nyefere ụnụ n’aka, nke bụ: N’abalị ahụ a raara ya nye, Onyenweanyị Jesu weere achịcha, nye Chineke ekele maka ya, nyawaa ya sị: “Nke a bụ ahụ M nke a na-enye maka ụnụ.

Na-emenụ nke a na ncheta nke M”. Otu ahụ kwa ka O si mee, mgbe ha richara nri anyasị, O buuru iko ahụ wee sị: “Iko a bụ ọgbụgba ndụ ọhụrụ n’ime ọbara M; mgbe ọ bụla ụnụ na-añụ ya, na-emenụ nke a na ncheta nke M”.

N’ihi ya, mgbe ọ bụla ụnụ riri achịcha nke a, ñụọ iko nke a, ụnụ na-ekwupụta ọnwụ Ya, ruo mgbe Ọ ga-abịa ọzọ!”

MBEKU – Jọn. 13:34

Onyenweanyị kwuru sị: Iwu ọhụrụ ka M na-enye ụnụ: Hụrịtaanụ onwe ụnụ n’anya otu M si hụ ụnụ n’anya.

OZIỌMA – 13:1-15

Ihe Ọgụgụ nke a si n’Oziọma dị asọ nke Jọn dere

Isi Okwu: Ugbu a ka O gosiri otu ịhụnanya Ya siri zuo oke.

Ọ bụ tupu mmemme Ngabiga. Jesu matara na oge eruola mgbe Ọ ga-esi n’ụwa nke a gafere, lakwuru Nna. Ọ hụrụ ndị nke Ya nọ n’ụwa n’anya mgbe niile.

Ma ugbu a ka O gosiri na Ọ hụrụ ha n’anya ruo na ọgwụgwụ. Mgbe ha nọ na nri anyasị, ekwensu etinyela ya rịị n’obi Judas Iskarịọt, nwa Saịmọn, ka o ree Jesu.

Ma Jesu maara na Nna weere ihe niile hanye Ya n’aka; na ya siri na Chineke bịa; na Ya na-alaghachikwuru Chineke. O wee si n’oche-nri kulite; yipụ uwe O yi n’elu; chịrị akwa mmiri kee n’ukwu.

Ọ bịa wụnye mmiri n’ime efere, bido ịsa ụkwụ Ụmụazụ Ya, bịakwa were akwa mmiri ahụ O kere n’ukwu na-ehicha ha ụkwụ. Ọ bịakwutere Saịmọn Pita, onye sịrị Ya: “Onyenwe m!

Ọ bụ Gị ga-asa m ụkwụ?” Jesu zara ya: Ugbu a, ị ghọtaghị ihe M na-eme, ma ị ga-aghọta ya ma e mesịa”. Pita zara Ya: “A naghị eme ya eme! I nweghị ike ịsa m ụkwụ!” Jesu azaa ya: “Ọ bụrụ na M asaghị gị, o nweghịkwa ihe ọzọ jikọrọ Mụ na gị”.

Saịmọn Pita wee sị: “Onyenwe m! Ọ bụghị naanị ụkwụ m ka ị ga-asacha, kama sachaakwa aka m na isi m.” Jesu wee sị ya: “Ọ dịghị mkpa ịsagharị ahụ onye a sara ahụ; maka na ahụ niile adịla ọcha.

Kama ọ bụghị onye ọ bụla nọ n’ebe a dị ọcha. Jesu maara onye ahụ ga-ere Ya. Ọ bụ ihe kpatara O ji sị: “Ọ bụghị ụnụ niile dị ọcha.” Mgbe Ọ sachara ha ụkwụ, O yiiri uwe Ya, nọdụkwa n’oche-nri.

O wee jụọ ha: “Ụnụ ghọtara ihe M mere ụnụ? Ụnụ na-akpọ M ‘Nna anyị ukwu’ na ‘Onyenweanyị’. Ụnụ mere nke ọma. N’ezie, a bụ m Nna ụnụ ukwu na Onyenwe ụnụ.

Ma ọ bụrụ na Mụ onwe m bụ ‘Nna ụnụ ukwu’ na ‘Onyenwe ụnụ’ sara ụnụ ụkwụ; ọ pụtara na ụnụ ga na-asarịta ụkwụ ibe ụnụ. Atọọrọla M ụnụ ụkpụrụ, ka ụnụ wee na-eme ihe a mụ meere ụnụ.

Igbo Mass readings for March 29 2024, Ezi Fraịdee

Igbo Mass Readings for March 28 2024, Ncheta Oriri Ikpeazụ (Tọọzde).

Catholic Sunday and Daily Mass Readings for 2024 (Kindle eBook & Paperback)

X
Scroll to Top
error: Alert: Content is protected !!

Receive Daily Mass Readings and Reflections via Email

You have successfully subscribed to the newsletter

There was an error while trying to send your request. Please try again.

Catholic Lectionary will use the information you provide on this form to be in touch with you and to provide updates and marketing.