Igbo Mass Readings for March 1 2025, Satọde n’ime Izuụka nke Asaa N’Oge Adanyeghị n’Emume.

Nke a bụ Igbo Mass Readings for March 1 2025, Satọde n’ime Izuụka nke Asaa N’Oge Adanyeghị n’Emume.

IHE ỌGỤGỤ NKE MBỤ – 17:1-15

Ihe Ọgụgụ e wetara n’akwụkwọ Sịrak

Yahweh si n’aja kee mmadụ, na ya bụ aja ka Ọ kpọchịghakwara ya. O nyere ndị mmadụ nwankenke oge ha ga-adị ndụ, mana O nyere ha ike n’ebe niile dị n’elu ụwa dị.

O nyere ha ike dịka nke ya, kee ha n’oyiyi nke ya. O mere ka ihe ndịọzọ niile e kere na-atụrụ mmadụ egwu. O mere ka ha na-achị ma anụọhịa ma nnụnụ na-efe efe.

O nyere ha ụzọ nghọta ise, ka o si nye anụ ndịọzọ, bịa nyekwa ha nke isii bụ akọnuuche na nke asaa bụ ililo, nke na-enyere ha aka ịkọwapụta nke ọma ihe ha natara site n’ụzọ nghọta ise ndị a. O nyere ha ire, anya, ntị na uche ha ji eche echiche.

O nyere ha ọmụma na nghọta n’uju gosi ha ihe dị icheiche n’etiti iheọma na ihe ọjọọ. O tinyere ihe nke ya n’ime obi ha ka ha na-ahụ ka ọrụaka ya si buo ibu, maa mma.

Ọ hapụrụ ha ka ha na-ekwupụta otito ya ebeebe, jiri ya na-anya isi ebighịebi. Ha ga na eto aha ya dị nsọ, na-ekwupụtakwa aka ọrụ ya buru ibu. O nyere ha onyinye nke ọmụma were kenye ha oke n’iwu nke ndụ.

Ya na ha gbara ndụ ga-adị ebighjebi, Ọ bịa gosịkwa ha ikpe nkwụmọtọ ya. Anya ha hụrụ ike ya dị ebube, ntị ha nụkwara olu ya dị otito.

Ọ sị ha, “Kpacharanụ anya maka ihe niile ezighị ezi”. O nyere onye ọbụla n’ime ha iwu gbasara ikwu na ibe. Ụzọ ha niile pụtara ihe n’ihu ya, o nweghị nke zoro ezo n’anya ya.

ABỤỌMA NA AZỊZA – Ps. 103:13-14, 15-16, 17-18

Azịza: Ịhụnaanya nke Onyenweanyị n’ebe ndị na-atụrụ ya egwu, na-adị ọkpụ, ọ na-adị ebeebe.

1. Dịka nna si emere ụmụ ya ebere,

otu ahụ ka Onyenweanyị si emeso ndị na-atụrụ ya egwu.

Ọ mara ihe e ji wee kee anyị,

Ọ na-echeta na anyị bụ ntụ. Azịza

2. Ogologo ndụ mmadụ akarịghị nke ahịhịa,

ọ naghị anọkarị ifuru osisi dị n’ọhịa.

Otu nnukwu ikuku kuo;                         

a gaghị ahụkwa ya ebe a ọzọ. Azịza

3. Ma n’agbanyeghị, ịhụnaanya nke Onyenweanyị

n’ebe ndị na-atụrụ ya egwu nọ, na-adị ọkpụ, ọ na-adị ebeebe

dịka obiọma ya dị n’ebe ụmụụmụ ya nọ,

Ọ na-adịgide oge ọbụla ha na-edobe ọgbụgbandụ ya. Azịza.

MBEKU – Matiu 11:25

Alleluia, Alleluia:

Ana m ekele gị Nna Dinwenụ nke eluigwe na ụwa, n’ihina i kpugheere ụmụntakịrị ihe omimi nke alaeze.

Alleluia.                         

OZIỌMA – 10:13-16

Ihe Ọgụgụ nke a si n’Oziọma dị asọ nke Mak dere

Ndị mmadụ kpọtaara Jesu ụmụntakịrị ka o metụ ha aka; ma ndị eso ụzọ ya baara ha mba. Ma mgbe Jesu hụrụ ihe ha na-eme, iwe were ya nke ukwuu.

O wee sị ha, “Hapụnụ ụmụntakịrị ka ha bịakwute m, ụnụ egbochila ha n’ihina Alaeze Chineke bụ nke ndị dị otu a.

N’ezie agwa m ụnụ, onye ọbụla nke na-agaghị anabata Alaeze Chineke dịka nwatakịrị, agaghị aba n’ime ya”. Ma o kuuru ha n’aka ya gọzie ha, bikwasa ha aka n’isi.

Igbo Mass Readings for March 1 2025, Satọde n’ime Izuụka nke Asaa N’Oge Adanyeghị n’Emume.