Igbo Mass Readings for April 20 2024, Satọde Izuụka nke Atọ n’oge Mbilite n’Ọnwụ Kristi

Nke a bụ Igbo Mass Readings for April 20 2024, Satọde Izuụka nke Atọ n’oge Mbilite n’Ọnwụ Kristi.

IHE ỌGỤGỤ NKE MBỤ – 9:31-42

Ihe Ọgụgụ ewetara n’Ọrụ Ndịozi

N’ihi ya nzukọ Kristi niile dị n’ala Judia, Grik na Sameria nwere udo. Ọ kwọdosiriike na-abawanye site n’ịtụ egwu nke Onyenweanyị na agbamume nke Mmụọ Nsọ.

Ka Pita na-agagharị na-agbasa oziọma, ọ gakwara hụ ndị otu Kristi bi n’obodo a na-akpọ Lida. N’ebe ahụ, ọ hụrụ otu nwoke akụkụ ahụ ya kpọnwụrụ akpọnwụ, a na-akpọ Eniyas nke nọrọla n’akwa ọrịa afọ asatọ.

Pita sịrị ya, “Eniyas! Jesu Kristi agwọọla gị! Bilie, dozie akwa gị.” Ozigbo ahụ o bilie. Ndị niile bi n’obodo Lida na Sherọn hụrụ ọrụ ebube nke a, chegharịa, bịakwute Onyenweanyị.

Na Jopa, o nwere otu nwaanyị na-eso ụzọ Jesu aha ya bụ Tabita, nke pụtara Dọkas n’asụsụ Grik. Ndụ nwaanyị a jupụtara n’ezi ọrụ, na ọrụ ebere n’ebe ụmụogbenye nọ.

N’oge ahụ, nwaanyị a dara ọrịa, nwụọ. Ka ha sachara ya ahụ, ha nyibere ya n’ụlọ elu. Ebe Lida dị Jopa nso, ndị na-eso ụzọ Jesu bi na Jopa nụrụ na Pita nọ na Lida, ziga ụmụnwoke ka ha rịọ Pita sị, “Biko, were ọsọ bịakwute anyị.”

Pita biliri soro ha gaba. Oge ọ bịaruru Jopa, ha duuru ya rịgoro n’ụlọ elu ahụ. Ụmụnwaanyị ajadu gbara ya gburugburu na-ebe akwa, na-egosi Pita uwe ndị Dọkas dụụrụ ha ka ọ dị ndụ. Pita chụpụrụ ha niile n’ezi, gbuo ikpere n’ala kpee ekpere.

Ọ tụgharịrị chee ozu ahụ ihu sị, “Tabita, bilie!” Nwaanyị ahụ meghere anya ya. O kuliri mgbe ọ hụrụ Pita. Pita nyeere ya aka ka ọ kwụrụ ọtọ, kpọkwaa ndị ahụ kwere na Kristi na ndị ajadu nwaanyị ahụ, kpọnye ha ya na ndụ. Akụkọ maka nke a gbasara n’ala Jopa niile. Ọtụtụ ndị mmadụ kweere n’Onyenweanyị.

ABỤỌMA NA AZỊZA – Ps. 116:12-13, 14-15,16-17.

Azịza: Kedụ ihe m ga-enye Onyenweanyị? Maka iheọma niile o meere m.

1. Kedụ ihe m ga-enye Onyenweanyị?

Maka iheọma niile o meere m.

Aga ebuli iko nzọpụta,

wee kpọkuo aha nke Onyenweanyị. Azịza

2. Aga m emejupụta nkwa m kwere Onyenweanyị,

n’ihu ndị nke ya niile.

Ọnwụ onye eziomume dị oke ọnụ,

n’ebe Onyenweanyị nọ. Azịza

3. Onyenweanyị abụ m nwodibo gị,

nwa nwaanyị ezigbo omume,

ị tọpụla m n’agbụ.

Aga m achụrụ gị aja ekele,

wee kpọkuo aha nke Onyenweanyị. Azịza

MBEKU

ALLELUIA ALLELUIA:

Jesu asị Tọmọs, “I kwerela n’ihi na ị hụrụ m? Ngọzi ga-adịrị ndị na-ahụghị ma kwere.

ALLELUIA.

OZIỌMA – 6: 60-69.

Ihe Ọgụgụ ewetara n’Oziọma dị asọ nke Jọn dere.

Mgbe ọtụtụ n’ime ndị na-eso ụzọ ya nụrụ nke a ha sịrị, “Okwu nke a tara akpụ, onye ga-anabata ya?” Jesu matara n’ime onwe ya, na ndị na-eso ụzọ ya na-atamu ntamu banyere okwu a.

Ọ sịrị ha, “Okwu a, ọ na-ewute ụnụ? Olee otu ọ ga-adịzi ma a sị na ụnụ ahụ Nwa nke mmadụ ka ọ na-arịgo n’ebe ọ nọrịị na mbụ? Ọ bụ mmụọ na-enye ndụ, anụahụ enweghị ihe ọ bụ.

Okwu ndị m gwara ụnụ bụ mmụọ bụrụkwa ndụ. Ma o nwere ụfọdụ n’ime ụnụ ndị na-ekwenyeghị.” N’ihina Jesu matara site na mbụ ndị na-ekwenyeghị n’ime ha, na onye ọ bụ nke ga-arara ya nye.

Ọ gwakwara ha sị, “Nke a mere m ji gwa ụnụ na ọ dịghị onye ọbụla nwere ike ịbịakwute m, ma ọ bụrụ na Nna m enyeghị ya ike ime nke a.” Mgbe nke a mechara ọtụtụ n’ime ndị na-eso ụzọ ya laghachiri azụ, hapụzie ị na-esogharị ya.

Jesu jụrụ ụmụazụ iri na abụọ sị, “Ụnụ chọkwuru iso ha pụọ?” Saịmọn Pita zara ya sị, “Onyenweanyị, onye ka anyị ga-ejekwu? Ọ bụ gị ji okwu nke ndụ ebeebe. Anyị onwe anyị ekwerela, bịa, matakwa na ị bụ Onye Nsọ ahụ nke Chineke.”

Igbo Mass readings for April 21 2024, Ụka Nke Anọ N’oge Ncheta Mbilite N’Ọnwụ Kristi – Afọ nke Abụọ

Igbo Mass Readings for April 20 2024, Satọde Izuụka nke Atọ n’oge Mbilite n’Ọnwụ Kristi.

Catholic Sunday and Daily Mass Readings for 2024 (Kindle eBook & Paperback)

X
Scroll to Top
error: Alert: Content is protected !!

Receive Daily Mass Readings and Reflections via Email

You have successfully subscribed to the newsletter

There was an error while trying to send your request. Please try again.

Catholic Lectionary will use the information you provide on this form to be in touch with you and to provide updates and marketing.