Igbo Mass Readings for September 9 2023, Satọde n’ime Izuụka nke Iri Abụọ na Abụọ N’Oge Adanyeghị n’Emume.

Nke a bụ Igbo Mass Readings for September 9 2023, Satọde n’ime Izuụka nke Iri Abụọ na Abụọ N’Oge Adanyeghị n’Emume.

IHE ỌGỤGỤ NKE MBỤ – 1:21-23

Ihe Ọgụgụ e wetara n’akwụkwọozi Pọl degaara Ndị Kolosi

Ụnụ ndị e wepụrụ n’ịhụnaanya Chineke na mbụ, na ndị nwere obi ọjọọ, na-eme ihe ọjọọ, ka o jirila ahụ ya ugbu a mee ka ụnụ na ya dịkwa na mma ọzọ site n’ ọnwụ ya.

O mere nke a iji mee ka ụnụ dị nsọ, zukwaa oke n’enweghị ntụpọ n’ihu ya. Ọ bụrụkwa na ụnụ ga-anọgide n’okwukwe, kwụsie ike, n’enweghị nkolopu n’ahapụghị nchekwube nke oziọma ahụ ụnụ nụrụ, nke e kwusaara ihe niile e kere eke n’okpuru anyanwụ nke mụ onwe m bụ Pọl bụụrụ onyeozi ya.

ABỤỌMA NA AZỊZA – Ps. 54: 3-4, 6, 8

Azịza: Chineke n’onwe ya bụ enyemaka m

1. Chineke, zọpụta m n’ihi aha gị.

Si n’ike Gị hụ na e nyere m ikpe nkwụmọtọ

Chineke nụrụ ekpere m;

gee ntị n’ihe m na-ekwu! Azịza

2. Ma ugbu a Chineke n’onwe ya na-abịa ịzọpụta m

Onyenweanyị bụ Onye na-echekwaba ndụ m

Aga m eji obi añụrị chụọrọ gị aja

tookwa aha gị nke jupụtara n’obiọma. Azịza

MBEKU – Ps. 119:34

Alleluia, Alleluia:         

Nye m nghọta ka m wee mata iwu gị, wee nwee ike iji obi m niile dobe iwu gị.

Alleluia

OZIỌMA – 6:1-5

Ihe Ọgụgụ nke a si n’Oziọma dị asọ nke Luk dere

N’otu ụbọchị Sabat, ka Jesu si n’ubi ọka na-agafe, ndị na-eso ụzọ ya ghọọrọ ogbe ọka ụfọdụ, nworo mkpụrụ ha na-ata.

Ma ụfọdụ ndị Farisii jụrụ ha sị, “Gịnị mere ụnụ ji eme ihe megide iwu n’ụbọchị izuike?” Jesu zara ha sị, “Ọ bụ na ụnụ agụbeghị ihe Devid mere oge agụụ gụrụ ya, ya na ndị ya na ha so.

Otu o siri banye n’ụlọ Chineke, were ogbe achịcha a na-eche n’ihu Chineke rie, nyetụkwa ndị ya na ha so, ọ bụ ezie na o zighị ezi n’iwu ka onye ọbụla rie ya ma ọ bụghị onye ụkọchukwu.”

Jesu wee sị ha, “Nwa nke mmadụ bụ onye nwe ụbọchị Sabat.”

Igbo Mass Readings for September 9 2023, Satọde n’ime Izuụka nke Iri Abụọ na Abụọ N’Oge Adanyeghị n’Emume.