Igbo Mass Readings for September 12 2026, Satọde n’ime Izuụka nke Iri Abụọ na Atọ N’Oge Adanyeghị n’Emume.

Nke a bụ Igbo Mass Readings for September 12 2026, Satọde n’ime Izuụka nke Iri Abụọ na Atọ N’Oge Adanyeghị n’Emume.

IHE ỌGỤGỤ NKE MBỤ – 10:14-22

Ihe Ọgụgụ e wetara n’akwụkwọozi mbụ Pọl Degaara ndị Kọrịnt

N’ihi ya, ndị m hụrụ n’anya, zerenụ ikpere arụsị. Ana m agwa ụnụ okwu dịka ndị nwere uche. Tụleenụ n’onwe ụnụ ihe m na-ekwu.

Ike nke ngọzi anyị na-agọzi n’oriri Nsọ, ọ bụghị inwekọ na ịñụkọ ọbara Kristi n’otu? N’ihina otu achịcha dị, ọ bụ ezie na anyị dị ọtụtụ, anyị bụ otu ahụ, n’ihina anyị niile na-eketa oke n’otu ogbe achịcha ahụ.

Chetanụ ka ndị Izrel mgbe ochie siri mee. Ọ bụ ndị na-eri ihe e jiri chụ aja abụghị ndị nnwekọ n’ebe nchụaja? Gịnịkwanụ bụ isi okwu m?

Ma arụsị, mọbụ ihe a chụrụ n’aja nye arụsị, bụ ihe ọbụla, mọbụ na ọ bụghị ihe? Mba! Kama ihe m na-ekwu bụ nke a: Na ihe ndị na-ekpere arụsị na-achụ n’aja bụ ndị mmụọ ọjọọ ka ha na-achụnyere, ọ bụghị Chineke.

Achọghị m ka ụnụ na ndị mmụọ ọjọọ nwee mmekọ. Ụnụ ekwesịghị ịñụ iko Dinwenụ ma na-añụkwa nke ndị Mmụọ ọjọọ. Anyị ga-akpasu Dinwenụ iwe? Ike anyị ọ karịrị nke ya?

ABỤỌMA NA AZỊZA – Ps. 116:12-13, 17-18

Azịza: Onyenweanyị, Aga m achụrụ gị aja ekele.

1. Kedụ ihe m ga-enye Onyenweanyị

Maka iheọma niile o meere m.

Aga m ebuli iko nzọpụta,

Wee kpọkuo aha nke Onyenweanyị. Azịza

2. Aga m achụrụ gị aja ekele

Wee kpọkuo aha nke Onyenweanyị

Aga m emejupụta nkwa m kwere Onyenweanyị,

n’ihu ndị nke ya niile. Azịza

MBEKU – 1 Pita 1:25

Alleluia, Alleluia:

Okwu nke Onyenweanyị ga-adịgide ruo mgbe ebighịebi. Okwu a bụkwa oziọma ahụ nke a gbaara ụnụ.

Alleluia                                  

OZIỌMA – 6: 43-49

Ihe Ọgụgụ nke a si n’Oziọma dị asọ nke Luk dere

Jesu gwara ndị na-eso ụzọ ya sị, “Osisi ọma anaghị amị mkpụrụ ọjọọ. Ọzọkwa osisi ọjọọ anaghị amị mkpụrụ ọma. Maka na a na-amata osisi ọbụla site na mkpụrụ ya.

N’ihina a naghịkwa aghọta ụdara n’osisi ogwu; a naghịkwa aghọta ụtụ n’osisi uke. Ezigbo mmadụ na-esite n’iheọma jupụtara ya obi na-eme iheọma, ma ajọ mmadụ, site n’ihe ọjọọ juru ya ahụ na-eme ihe ọjọọ, n’ihina site n’ọnụ ka e ji ekwupụta ihe juru n’obi.

Gịnị mere ụnụ ji akpọ m Dinwenụ m, Dinwenụ m, ma ụnụ anaghị eme ihe m gwara ụnụ? Onye ọbụla nke na-abịakwute m, na-anụ okwu m, ma na-emekwa ha, aga m ezi ụnụ ihe onye ahụ dịka ya.

Ọ dị ka otu nwoke wuru ụlọ, nke gwuru ala gwubaa ya n’ime, tọọ ntọala ya n’elu nkume; ma mgbe idemmiri bịara, mmiri ahụ wụkwasara ụlọ ahụ, ma ọ kwadalịghị ya, n’ihina e wuru ya nke ọma.

Ma onye na anụ okwu m niile na-anaghị eme ha dịka nwoke wuru ụlọ n’elu uzuzu na-atọghị ntọala, e mechaa mmiri iyi asọkwasa ya, ozigbo ụlọ ahụ wee daa, ọdịda ya dị egwu.

Igbo Mass Readings for September 12 2026, Satọde n’ime Izuụka nke Iri Abụọ na Atọ N’Oge Adanyeghị n’Emume.