Igbo Mass Readings for June 17 2023, Satọde n’ime Izuụka nke Iri N’Oge Adanyeghị n’Emume.

Nke a bụ Igbo Mass Readings for June 17 2023, Satọde n’ime Izuụka nke Iri N’Oge Adanyeghị n’Emume.

IHE ỌGỤGỤ NKE MBỤ – 5:14-21

Ihe Ọgụgụ e wetara n’akwụkwọozi nke abụọ Pọl Degaara ndị Kọrịnt

Ọ bụ ịhụnaanya Kristi na-edu anyị n’ihina anyị kwere na otu onye nwụrụ maka mmadụ niile; nke pụtara na mmadụ niile anwụọla.

Ọ nwụrụ maka mmadụ niile, ka ndị na-adị ndụ ghara ịdị ndụ maka naanị onwe ha, kama maka onye ahụ nwụrụ n’ihi ha ma sikwa n’ọnwụ kulie. Bido ugbu a gaba, anyị adịghị elekwasị onye ọbụla anya dịka mmadụ nkịtị.

Ọ bụ ezie na anyị na-ahụ Kristi dịka mmadụ nkịtị na mbụ, ma anyị adịghị ahụ ya otu ahụ ọzọ. Otu ọ dị, ọ bụrụ na onye ọbụla amalite ịdị ndụ n’ime Kristi, ọ ghọọla onye e kere ọhụrụ, ihe ochie agaala, nke ọhụrụ wee nọchie.

Ihe ndị a niile bụ aka ọrụ Chineke, onye sitere na Kristi mee ka anyị na ya dị n’otu ọzọ, nyekwa anyị ọrụ ime ka Chineke na ụmụ mmadụ dị n’otu. Ihe nke a pụtara bụ na Chineke sitere na Kristi na-eme ka ya na ụwa dị na mma.

Chineke adịghịkwa agụkọrọ ụmụ mmadụ mmehie ha niile kama o tinyela n’aka anyị ozi banyere ụzọ o si eme ka ya na ụmụ mmadụ dịkwa na mma ọzọ.

Anyị bụ ndị nnọchite anya nke Kristi Chineke sitere n’ime anyị na-akpọ ụnụ oku. Anyị na-arịọ ụnụ n’aha Kristi ka ụnụ na Chineke dịkwa na mma ọzọ.

Ọ bụ n’ihi anyị ka Chineke jiri mee ka Kristi were ọnọdụ na ahụhụ dịịrị ndị mmehie ebe o meghị njọ ọbụla, Chineke mere nke a ka anyị wee bụrụ ndị eziomume nke ya n’ime Kristi.

ABỤỌMA NA AZỊZA – Ps. 103:1-2,3-4,8-9,11-12

Azịza: Osebụrụwa dị ebere na ịhụnaanya.

1. Gọzie Onyenweanyị, mkpụrụobi m,

gọzie aha ya dị nsọ, ihe niile dị n’ime m!

Gọzie Onyenweanyị, mkpụrụobim,

echezọkwala obi ebere ya niile. Azịza

2. Nke o ji gbaghara njọ gị niile,

ma gwọọ ọrịa gị niile,

nke o ji si n’olulu zọpụta ndụ gị,

nke o ji were ịhụnaanya na obi ebere kpube gị okpueze. Azịza

3. Osebụrụwa dị ebere na ịhụnaanya,

ọ naghị ewe iwe ngwa ngwa,

ịhụnaanya ya dị ukwuu,

iwe ya anaghị adị ebeebe,

ịkpọ asị ya na-adị sọ nwa ntịtị oge. Azịza

4. Dịka eluigwe siri dị elu n’ebe ụwa dị,

otu ahụ ka ịhụnaanya ya siri dị ukwuu

n’ebe ndị na-atụrụ ya egwu nọ.

Ọ na-ewepụ njọ anyị n’ebe anyị nọ

karịa otu ọwụwa anyanwụ si dị anya n’ọdịda ya. Azịza

MBEKU – Ps. 119:88

Alleluia, Alleluịa:

Site n’ịhụnaanya gị na enweghị ube, zọpụta m, ka m wee nwee ike idobe iwu gị.

Alleluia.

OZIỌMA – 5:33-37

Ihe Ọgụgụ nke a si n’Oziọma dị asọ nke Matiu dere

Jesu gwara ndị na-eso ụzọ ya sị, “Ọzọ, ụnụ nụrụ na a gwara ndị ochie sị “Ụnụ añụla iyi ụgha, kama mezuore Osebụrụwa ihe ị ñụrụ n’iyi. Ma ana m agwa ụnụ! Añụla iyi ma ọlị.

Ejila eluigwe añụ iyi n’ihina ọ bụ ocheeze Chineke. Ejikwala ala añụ iyi n’ihina ọ bụ ebe mgbakwasị ukwu ya; mọbụ Jerusalem, n’ihina ọ bụ obodo nke eze ukwu ahụ.

Ejikwala isi gị n’ihina i nweghị ike ime ka otu ntụtụisi gị dị ọcha mọbụ dị oji. Ya bụ, ka okwu gị niile bụrụ, ‘Ee’ mọbụ ‘Mba’, ihe ọzọ kariri nke a sị n’aka ekwensu.

Igbo Mass Readings for June 17 2023, Satọde n’ime Izuụka nke Iri N’Oge Adanyeghị n’Emume.