Igbo Mass Readings for May 4 2023, Tọọzde n’ime Izuụka nke Anọ n’oge Mbilite n’Ọnwụ Kristi

Nke a bụ Igbo Mass Readings for May 4 2023, Tọọzde n’ime Izuụka nke Anọ n’oge Mbilite n’Ọnwụ Kristi.

IHE ỌGỤGỤ NKE MBỤ – 13:13-25

Ihe Ọgụgụ ewetara n’Ọrụ Ndịozi

Pọl na ndị otu ya siri Pafọs jiri ụgbọmmiri ruo Pega nke dị n’ala Pamfilịa. Ebe a ka Jọn hapụrụ ha laghachi Jerusalem. Ha sikwara Pega ruo Antiọk nke dị n’ala Pisidia.

N’ụbọchị Sabat, ha banyere n’ụlọ nzukọ ndị Juu nọdụ ala. Mgbe a gụpụtachara ihe site n’Akwụkwọ Iwu Mosis na site n’Akwụkwọ ndị amụma, ndịisi ụlọ nzukọ ahụ zigaara ha ozi sị, “Ụmụnne anyị ọ bụrụ na ụnụ nwere okwu agbamume ụnụ ga-ekwu, bịanụ gwa anyị.

Pọl biliri feere ha aka ka ha gee ntị, bido kwube okwu sị, “Ndị Izrel ibe m, na ndị mba ọzọ, ndị na-atụ egwu Chineke nọ ebe a, geenụ m ntị. Chineke nke Izrel, họọrọ nnanna anyị ha, mee ka ha bụrụ oke mba oge ha bi n’ala ljipt.

O ji ike aka ya dupụta ha n’ala ahụ. O dikwara omume ha ihe dịka iri afọ anọ n’ọzara. O kpochapụrụ ndị bi n’obodo asaa dị n’ala Kenaan, were ala ha nye ndị Izrel, ka ihe nketa, ihe dịka narị afọ anọ na iri ise.

Ka nke a gachara, o nyere ha ndị ọkaikpe, dịka ndị ndu wee ruo oge nke Samuel onye amụma. Ha rịọrọ ya ka e nye ha eze, Chineke nye ha Sọl nwa Kish, onye si n’agbụrụ Benjamin, ka ọ bụrụ eze ha.

Ọ chịrị ha iri afọ anọ. Mgbe Chineke wepụrụ ya n’ọchịchị. Ọ kpọlitere Devid ka ọ bụrụ eze ha, onye ọ gbaara akaebe, sị, “Ahụla m Devid nwa Jese dịka ụdị mmadụ m chọrọ, onye ga-eme ihe niile bụ uche m.

Ọ bụ site na ụmụụmụ nwoke a ka Chineke si wetara ụmụ Izrel onye nzọpụta dịka o si kwe na nkwa. Tupu ọbịbịa ya, Jọn ekwusaarala ndị Izrel banyere mmirichukwu nke nchegharị.

Na ngwụcha ọrụ Jọn, o kwuru sị, “Onye ka ụnụ chere na m bụ? Abụghị m onye ahụ ụnụ na-atụ anya ya. Kama leenụ! Otu onye na-esochi m n’azụ, onye mụ etorughị ịtọpụ eriri akpụkpọ ụkwụ ya.”

ABỤỌMA NA AZỊZA – Ps. 89: 2-3, 21- 22, 25, 27.

Azịza: Aga m eji ukwe kwupụta ịhụnaanya nke Onyenweanyị ebeebe-ebeebe.

1. Aga m eji ukwe kwupụta ịhụnaanya nke Onyenweanyi ebeebe-ebeebe;

bido na ndụdụgandụ ruo na ndụdụgandụ aga m na-ekwupụta ntụkwasịobi gị.

N’ihina ịhụnaanya gị ga-adị ebeebe,

ikwesị ntụkwasịobi gị ga-akwụdosi ike dịka igwe. Azịza

2. Ahọọrọla m nwodibo m bụ Devid,

eteela m ya mmanụ ka ọ bụrụ eze.

Aga m anọnyere ya oge niile,

enyemaka m ga-abụ ike ya. Azịza

3. Ịhụnaanya m na ịkwụdosiike m ga-anọnyere ya oge niile,

aga m enye ya mmeri oge niile n’ihi aha m.

Ọ ga-ebeku m sị, “Ị bụ nna m, Chineke m na onye enyemaka m.” Azịza

MBEKU

ALLELUIA ALLELUIA:

Jesu asị Tọmọs, “I kwerela n’ihi na ị hụrụ m? Ngọzi ga-adịrị ndị na-ahụghị ma kwere.

ALLELUIA.

OZIỌMA – 13:16-20.

Ihe Ọgụgụ ewetara n’Oziọma dị asọ nke Jọn dere. Mgbe Jesu sachara ụkwụ ha, ọ sịrị ha, N’ịgwa ụnụ eziokwu odibo anaghị aka nna ya ukwu, nke onye e zitere na-aka onye zitere ya.

Ọ bụrụ na ụnụ maara ihe ndị a, ngọzi ga-adịrị ụnụ ma ụnụ na eme ha. Anaghị m ekwu maka ụnụ niile, Ama m ndị m họọrọ kama ọ bụ ka e mejupụta ihe e dere n’Akwụkwọ Nsọ sị, “Onye mụ na ya rikọrọ nri amalitela imegide m.”

Ana m agwa ụnụ nke a ugbu a tupu o mezuo, ka ọ ga-abụ mgbe o mezuru, ụnụ ekwere na-abụ m ihe m bụ. Ana m agwa ụnụ eziokwu, onye ọbụla nke nabatara onye m ga-ezite, nabatara m. Onye nabatara m, na- anabatakwa onye zitere m.”

Igbo Mass readings for May 5 2023, Fraịde n’ime Izuụka nke Anọ n’oge Mbilite n’Ọnwụ Kristi.

Igbo Mass Readings for May 4 2023, Tọọzde n’ime Izuụka nke Anọ n’oge Mbilite n’Ọnwụ Kristi.