Igbo Mass Readings for February 27 2025, Tọọzde n’ime Izuụka nke Asaa N’Oge Adanyeghị n’Emume.

Nke a bụ Igbo Mass Readings for February 27 2025, Tọọzde n’ime Izuụka nke Asaa N’Oge Adanyeghị n’Emume.

IHE ỌGỤGỤ NKE MBỤ – 5:1-8

Ihe Ọgụgụ e wetara n’akwụkwọ Sịrak

Atụkwasịkwala obi gị n’akụnụụba gị, mọbụ na-asị, “Enwezuela m”. Ekwekwala ka ọchịchọ gị niile chịba gị. Esokwala agụụ niile nke obi gị. Asịkwala, “Onye nwere ike n’ebe m nọ?”

N’ihina Yahweh ga atarịrị gị ahụhụ maka nke a. Asịkwala, “Emeela m njọ, kedụkwanụ ihe mere m?” maka na iwe nke Yahweh ji nwayọọ abịa, Ejikwala ntụkwasịobi i nwere na mgbaghara njọ wee na-eme njọ na-atụkwasị n’elu njọ.

Ekwukwala sị, “Obiebere ya ebuka, Ọ ga-agbaghara ọtụtụ njọ m niile”. N’ihina ma ebere ma iwe bụ nke ya. Iwe ya na-adakwasị ndị mmehie.

Atụfukwala oge n’ịlaghachi azụ n’ebe Yahweh nọ, mọbụ na-ebugharị ya mgbe mgbe, maka na mberede, iwe nke Yahweh ga abịa. N’oge ahụhụ Ọ ga-ala gị n’iyi.

Atụkwasịkwala obi n’akụnụụba e nwetara n’ụzọ ezighị ezi, maka na ọ gaghị abara gị uru n’ụbọchị mbibi.

ABỤỌMA NA AZỊZA – Ps.: 1:1-2, 3, 4, 6.

Azịza: Añụrị na-adịrị ndị tụkwasịrị obi na Onyenweanyị.

1. Añụrị ga-adịrị nwoke ahụ nke anaghị eso

ndụmọdụ onye ajọomume,

mọbụ na-akwụgharị n’ụzọ ndị ome njọ,

mọbụ nọdụ n’otu ndị na-ekwutọ Chineke.

Kama ọ na-enwe añụrị n’ebe iwu Onyenweanyị dị;

ma na-achịgharị iwu ya n’obi ya ehihie na abalị. Azịza

2. Ọ dị ka osisi a kụrụ n’akụkụ iyi,

nke na-amịpụta mkpụrụ ya n’oge ya,

nke akwụkwọ ya anaghị akpọnwụ akpọnwụ,

ihe niile ọ na-eme na-agara ya nke ọma. Azịza

3. Ọ dịghị otu a n’ebe ndị ajọ mmadụ nọ;

Mba, n’ihina ha dịka afụrụ ọka nke ikuku na-ebugharị.

N’ihina Onyenweanyị na-echekwaba ụzọ ndị eziomume,

mana ụzọ ndị ajọ omume na-eduba n’ịla n’iyi. Azịza

MBEKU – Ps. 27:11

Alleluia, Alleluia:                                    

Kuziere m ụzọ gị, O Dinwenụ, Dube m n’ụzọ kwụ ọtọ.

Alleluia.

OZIỌMA – 9:41-50

Ihe Ọgụgụ nke a si n’Oziọma dị asọ nke Mak dere

Jesu gwara ndị na-eso ụzọ ya sị, n’ezie agwa m ụnụ onye ọbụla nke ga ekunye ụnụ otu iko mmiri ka ụnụ ñụọ n’ihina ụnụ bụ ndị nke Kristi, aghaghị ịnata ụgwọ ọrụ ya.

“Onye ọbụla ga-eme ka otu n’ime ụmụntakịrị ndị a kwere na m daba na njọ, ọ ga-akara onye ahụ mma ma a sị na a nyabara ya nnukwu nkume e ji egwe ọka n’olu, tụba ya n’ime osimiri.

Ọ bụrụ na aka gị abụọ ga-eme ka ị dahie ụzọ bepụ ya; ọ ga akara gị mma ịbụrụ ọrụsị banye na ndụ, karịa inwe aka gị abụọ wee baa n’ọkụmmụọ, n’ọkụ na-adịghị anyụanyụ.

Ọzọ, ọ bụrụ na ụkwụ gị ga eme ka ị dahie, gbupụ ya; ọ ga-akara gị mma ịba na ndụ na ngwọrọ, karịa inwe ụkwụ abụọ a tụba gị n’ọkụmmụọ.

Ọ bụrụkwa na anya gị ga-eme ka ị dahie, ghụpụ ya; ọ ga-akara gị mma inwe otu anya ma banye n’Alaeze Chineke, karịa inwe anya abụọ a tụba gị n’ọkụmmụọ, ebe ikpuru na-ata ha na-adịghị anwụ anwụ.

A dịghị emenyụkwa ọkụ ya emenyụ. N’ihina a ga-eji ọkụ ñụchaa onye ọbụla. Nnu bụ ihe dị mma, ma ọ bụrụ na nnu atụfuo ụtọ ya, kedụ ka a ga-esi mee ka ọ dị ụtọ ọzọ? Nweenụ nnu n’ime onwe ụnụ, ụnụ na ibe ụnụ dịkwa n’udo.”

Igbo Mass Readings for February 27 2025, Tọọzde n’ime Izuụka nke Asaa N’Oge Adanyeghị n’Emume.