Igbo Mass Readings for January 29 2026, Tọọzde n’ime Izuụka nke Atọ N’Oge Adanyeghị n’Emume.

Nke a bụ Igbo Mass Readings for January 29 2026, Tọọzde n’ime Izuụka nke Atọ N’Oge Adanyeghị n’Emume.

IHE ỌGỤGỤ NKE MBỤ – 7:18-19, 24-29

Ihe Ọgụgụ ewetara n’Akwụkwọ abụọ nke Samuel

Eze Devid banyere n’Ụlọikwu nsọ Yahweh nọdụ ala. O wee kpee ekpere sị, “Abụ m onye, Yahweh Chineke? Gịnị ka ezinụụlọ m bụ I ji meere m iheọma niile a? Ma n’anya gị, Yahweh Chineke, nke a abụghị ihe ọbụla, I mere ka nkwa gị ruo n’ọdịniihu n’ebe ụlọ nwodibo gị dị.

I meela ka Izrel bụrụ ndị nke gị ebeebe. Gị onwe gị Yahweh abụrụla Chincke ha. Ugbu a Yahweh Chineke mezuo nkwa i kwere nwodibo gị na ezinụụlọ ya. Mekwaa dịka I kwuru. Aha gị ga-adị ukwu ebeebe. Ndị mmadụ ga na-ekwu sị, Osebụrụwa nke igwe ndịagha bụ Chineke nke Izrel.

Ezinụụlọ nwaodibo gị Devid ga-akwụdosịkwa ike n’ihu gị. Yahweh Chineke nke igwe ndịagha! Gị, Chineke nke Izrel! Enwere m obi siri ike ikpe ekpere nke a n’ihina i kpugheere mụ, bụ odibo gị ihe ndị a niile, wee gwakwa m na ị ga-eme ka ụmụ m bụrụ eze.

Yahweh Chineke, gị onwe gị bụ Chineke! Okwu gị niile bụkwa eziokwu. Ugbu a, i kwela nwodibo gị nkwa ọma nke a. Ya mere, ana m arịọ ka ị gọzie ndị agbụrụ m, ka ha nọgide n’ihu gị ebeebe. Gị onwe gị, Yahweh Chineke ejirila ọnụ gị kwe nkwa nke a. Site na ngọzi gị, ụlọ nwodibo gị ga-abụ ụlọ a gọziri agọzi ebeebe.

ABỤỌMA NA AZỊZA – Ps. 132: 1-2, 3-5, 11, 12, 13-14.

Azịza: Onyenweanyị ga-enye ya alaeze nna ya Devid.

1. O Onyenweanyị, cheta Devid,

na ahụhụ ọ tara

Na iyi nke ọ ñụọrọ Chineke,

Nkwa nke o kwere onye dị ukwuu nke Jekọb. Azịza

2. “Agaghị m aba n’ụlọ m,

mọbụ rịgoro n’akwa m.

Agaghị m arahụ ụra ọbụla,

mọbụ mechie anya m,

Wee ruo mgbe m nwetaara Onyenweanyị ọnọdụ,

Ebe obibi nke onye kacha elu nke Jekọb.” Azịza

3. Onyenweanyị ñụọrọ Devid iyi,

ọ gaghị echegharị na ya,

“Otu n’ime ụmụ gị

ka m ga-akwụba n’ocheeze gị. Azịza

4. Ọ bụrụ na ụmụ gị edobe iwu niile nke m nyere ha,

na atụmaatụ niile m ga-akụziri ha,

ụmụ ha na agbụrụ ha niile

ga-anọkwa n’ocheeze gị ebeebe. Azịza

5. N’ihina Onyenweanyị ahọrọla Zayọn,

ọ họrọla ya ka ọ bụrụ ebe obibi ya,

“Ebe a ka m ga-anọ ebeebe,

ebe a bụ ebe obibi m họọrọ. Azịza

MBEKU

Alleluia, Alleluia:

Okwu gị bụ mpanaka na-edu m, bụrụkwa ịhe n’ụzọ m.

Alleluia.

OZIỌMA – 4:21-25

Ihe Ọgụgụ nke a si n’Oziọma dị asọ nke Mak dere.

Jesu jụrụ igwe mmadụ ahụ sị, “A na-ebute mpanaka ka e jiri efere kpuchie ya mọbụ ka a dọba ya n’okpuru akwa ndina? Ọ bụ ihe a na eme abụghị ịdọkwasị ya n’elu ihe ịdọkwasị ọkụ?

O nweghị ihe e zoro ezo nke na-agaghị apụta ihe; o nweghịkwa ihe e kpuchiri ekpuchi nke a na-agaghị ekpughe. Onye nwere ntị ịnụ ihe, ya nụrụ”.

Ọ sịkwara ha, “Kpacharanụ anya n’ihe ụnụ na-anụ, n’ihina otu ụnuụ si meso ndị ọzọ ka a ga-esi meso ụnụ, ma meso ụnụ karịa. Onye ọbụla nwerenụ ka a ga agbakwunyere ọzọ; ma onye na-enweghị ihe o nwere, ọ bụladị ndị o nwere enwe, a ga-anapụ ya ha”.

Igbo Mass Readings for January 29 2026, Tọọzde n’ime Izuụka nke Atọ N’Oge Adanyeghị n’Emume.