Igbo Mass Readings for September 18 2025, Tọọzde n’ime Izuụka nke Iri Abụọ na Anọ N’Oge Adanyeghị n’Emume.

Nke a bụ Igbo Mass Readings for September 18 2025, Tọọzde n’ime Izuụka nke Iri Abụọ na Anọ N’Oge Adanyeghị n’Emume.

IHE ỌGỤGỤ NKE MBỤ – 4:12-16

Ihe Ọgụgụ e wetara n’akwụkwọozi mbụ Pọl degaara Timoti

Ekwela ka onye ọbụla lelịa gị anya n’ihina ị bụ nwata. Kama mee ka ị bụrụ ihe ịmaatụ nye ndị kwere ekwe: n’okwu na n’omume n’ịhụnaanya n’okwukwe na n’ịdịọcha.

Na-agụpụtara ndị mmadụ Akwụkwọ Nsọ, nọdụ n’ịgbasa oziọma na ikuziri ha ihe ruo mgbe m ga-abịa. Elelikwala onyinye Mmụọ Nsọ ahụ nke dị n’ime gị, nke ị natara site n’ibu amụma mgbe ndị okenye bikwasara gị aka n’isi. Jisie ike na-eme ihe ndị a.

Tinye ndụ na oge gị n’ime ha, ka mmadụ niile hụ ọganiihu gị. Kpachapụ anya banyeere onwe gị na nkuzi gị; jidesie nke a ike, n’ihina site n’ime otu a, ị ga-azọpụta onwe gị na ndị na-ege gị ntị.

ABỤỌMA NA AZỊZA – Ps. 111: 7-8, 9, 10

Azịza: Lee ka ọrụ niile nke Onyenweanyị siri jupụta n’otito na ebube.

1. Ihe niile ọ na-eme bụ n’ịkwụdosiike na ikpe nkwụmọtọ,

Iwu ya dị ntụkwasịobi n’ụzọ niile,

nke a mere a ọ dị ebeebe ebeebe

nke dị n’ụdị ịkwụdosiike na ugwu. Azịza

2. Ọ na-abịa ịgbapụta ndị nke ya ọsọọsọ

na-enye ọgbụgbandụ ya otu mgbe

aha ya dị nsọ, kwesị na anyị ga-atụrụ ya egwu. Azịza

3. Ịtụ egwu nke Onyenweanyị bụ mbido amamihe

ha nwere uche ziri ezi bụ ndị na-eme ya

A ga-ekwe ukwe otito ya ebeebe. Azịza

MBEKU – Jemis 1:21

Alleluia, Alleluia:

Werenụ nwayọọ nara okwu ahụ nke a kụrụla n’obi ụnụ dị ka mkpụrụ, nke pụrụ ịzọpụta mkpụrụobi ụnụ.

Alleluia

OZIỌMA – 7:36-50

Ihe Ọgụgụ nke a si n’Oziọma dị asọ nke Luk dere

Otu onye Farisii kpọrọ Jesu oriri; O wee gaa n’ụlọ onye Farisii ahụ, nọdụ ala n’oche nri. Ma lee, otu nwaanyị nke bi n’obodo ahụ, bụ onye omenjọ; mgbe ọ matara na Jesu nọ n’oche nri n’ụlọ onye Farisii ahụ, o wetara otu ite e jiri nkume alabasta mee nke mmanụ otite juru n’ime ya.

Ka o guzoro n’ụkwụ Jesu na-ebe akwa, ọ na-ebesa anyammiri n’ụkwụ ya, werekwa ntụtụisi ya na-ehicha ha, sutụ ha ọnụ, werekwa mmanụ otite tee ha.

Ma mgbe onye Farisii ahụ kpọrọ Jesu oriri hụrụ nke a, o kwuru n’obi ya sị, “A sị na nwoke a bụ onyeamụma, Ọ gaara amata onye nwaanyị a na-akpatu ya aka bụ n’ihina ọ bụ onyenjọ.”

N’ịza nke a Jesu sịrị ya, “Saịmọn, o nwere ihe m ga-agwa gị.” Saịmọn azaa sị, “Onyenkuzi olee ihe ọ bụ?” “Otu onye na-ebinye ndị mmadụ ego nwere mmadụ abụọ ji ya ụgwọ.

Otu onye ji ya narị ego ise, onye ọzọ ji ya iri ego ise. Mgbe ha na-enweghị ike ịkwụli ụgwọ ha ji, nwoke ahụ gbagharala ha. N’ime mmadụ abụọ a olee nke ga-ahụ nwoke ahụ n’anya karịa?”

Saịmọn zara sị, “Eche m na ọ bụ onye ahụ ọ gbagharala nke ukwuu.” Jesu asị ya, “Ị zara nke ọma.” O wee tụgharịa n’ebe nwaanyị ahụ nọ bịa sị Saịmọn, “Ị hụla nwaanyị a?

Abatara m n’ụlọ gị ma I nyeghị m mmiri maka ụkwụ m ma nwaanyị a ejirila anyammiri ya saa ụkwụ m, ma werekwa ntụtụisi ya hichaa ha.

I sutụghị m ọnụ ọbụla, ma site na mgbe m batara n’ebe a, ọ kwụsịbeghị isutụ ụkwụ m ọnụ. I teghị m mmanụ n’isi, ma o werela mmanụ isiọma tee m n’ụkwụ.

Ya bụ, ana m agwa gị, a gbagharala ya ọtụtụ mmehie ya n’ihina o nwere ịhụnaanya dị ukwuu; ma onye ọbụla nwetara mgbaghara dị nta na-enwe ịhụnaanya dị nta.”

Jesu siri nwaanyị ahụ, “A gbagharala gị njọ gị niile. Mgbe ahụ ka ndị ya na ha nọ n’oche nri malitere ikwu n’etiti onwe ha sị, “onye bụ onye a nke na-agbaghara njọ?”

Ma Jesu sịrị nwaanyị ahụ, “Okwukwe gị azọọla gị; laa n’udo.”

Igbo Mass Readings for September 18 2025, Tọọzde n’ime Izuụka nke Iri Abụọ na Anọ N’Oge Adanyeghị n’Emume.