Igbo Mass Readings for February 17 2028, Tọọzde n’ime Izuụka nke Isii N’Oge Adanyeghị n’Emume.

Nke a bụ Igbo Mass Readings for February 17 2028, Tọọzde n’ime Izuụka nke Isii N’Oge Adanyeghị n’Emume.

IHE ỌGỤGỤ NKE MBỤ – 2:1-9

Ihe Ọgụgụ ewetara n’Akwụkwọozi Jemis

Ụmụnna m! Dịka ndị kwere n’Onyenweanyị Jesu Kristi, bụ onye nwe ebube niile ụnụ ejila ile mmadụ anya n’ihu, na ịkpa oke emeso onye ọbụla.

A sị na otu ọgaranya yi uwe mara mma nke ukwu, gbarakwa mgbaaka ọlado, abata n’ụlọ nzukọ ụnụ: a sịkwa na otu ogbenye yi uwe ruru inyi abatakwa otu mgbe ahụ gịnị ka ụnụ ga-eme?

Ọ bụrụ na ụnụ elee onye ọgaranya ahụ anya sị ya: Bịa nọdụ n’otu oche a e dobere iche n’ihi gị ma ụnụ asị onye ogbenye ahụ, Di anyị, I nwere ike iguzo n’ebe ahụ, mọbụ bịa nọdụ ala n’ebe a ụkwụ m dị; Ọ bụ na ụnụ akpabeghị oke n’etiti onwe ụnụ bụrụkwa ndị ji ile anya n’ihu na obi ọjọọ na-ekpe ikpe?

Geenụ ntị, ụmụnna m hụrụ n’anya! Ọ bụ na Chineke ahọrọbeghị ndị bụ ogbenye n’ihe nke ụwa ka ha bụrụ ndị ogaranya n’okwukwe bụrụkwa ndị nketa nke alaeze ahụ nke o kwere nkwa inye ndị hụrụ ya n’anya?

Ma ụnụ akparịala nwa ogbenye! Ọ bụ na ọ bụghị ndị ọgaranya ụnụ na-asọpụrụ na-emegbu ụnụ? Ọ bụ na ọ bụghị ha na-akpụpụ ụnụ n’ụlọikpe? Ọ bụ na ọ bụghị ha na-ekwutọ aha ọma ahụ nke a gụrụ ụnụ?

Ọ bụrụ na ụnụ edebezuo iwu nke Eze anyị dịka e dere ya n’Akwụkwọ Nsọ sị: Hụ mmadụ ibe gị n’anya dịka onwe gị! Ụnụ mere nke ọma.

Ọ bụrụ na ụnụ na-eji ile anya n’ihu na-emeso mmadụ ibe ụnụ, ụnụ na-eme njọ. Iwu Chineke amala ụnụ ikpe dịka ndị na-emebi iwu.

ABỤỌMA NA AZỊZA – Ps. 34: 1-2,3-4,5-6

Azịza: Onyenweanyị na-anụ mkpu akwa nwogbenye

1. Aga m eto Onyenweanyị oge niile,

Otito ya ga-adị n’egbugbere ọnụ m mgbe ọbụla.

Mkpụrụobi m na-egorị n’Onyenweanyị;

ka ndị umeala nụrụ ma ñụrịa. Azịza

2. Soronụ m kwupụta ịdịukwu nke Onyenweanyị,

Soronụ m too aha ya.

Akpọkuru m Onyenweanyị Ọ za m

Ọ zọpụtara m n’egwu niile na-atụ m. Azịza

3. Ihu ọbụla chere n’ebe Onyenweanyị nọ na-amụke amụke,

ihere anaghị eme ya ma ọlị.

Onyenweanyị na-anụ mkpu akwa nwogbenye,

Ọ na-enyekwara ya aka na nsogbu ya niile. Azịza

MBEKU – Jon 14:23

Alleluia, Alleluia:

Ọ bụrụ na mmadụ ahụ m n’anya, ọ ga-edobe okwu m. Nna ga-ahụkwa ya n’anya. Anyị ga-abịkwute ya, biri n’ime ya.

Alleluia.

OZIỌMA – 8:27-33

Ihe Ọgụgụ nke a si n’Oziọma dị asọ nke Mak dere

Jesu na ndị na-eso ụzọ ya pụrụ gagharịa n’obodo nta dị icheiche nke obodo Sizerịa Filipi. Ka ha na-aga n’ụzọ, Jesu jụrụ ndị na-eso ụzọ ya sị, “Onye ka ndị mmadụ na-asị na mụ onwe m bụ?”

Ha sịrị ya, “Ụfọdụ na-ekwu na ị bụ Jọn, onye na-eme mmirichukwu, ndị ọzọ na-ekwu na ị bụ Elaịja, ndị ọzọkwa na-asị na ị bụ otu onye n’ime ndị amụma”.

Ọ jụrụ ha sị, “Onye ka ụnụ onwe ụnụ na-asị na m bụ?” Pita zara ya sị, “Gị onwe gị bụ Kristi ahụ!”: Ọ dọrọ ha aka na ntị ka ghara ịgwa onye ọbụla banyere ya.

Jesu bidoro ịkụziri ndị na-eso ụzọ ya na nwa nke mmadụ ga-ata ọtụtụ ahụhụ, ndị okenye na ndịisi nchụaja na ndị odeakwụkwọ ga-ajụkwa ya, a ga-egbu ya.

Ma mgbe ụbọchị atọ gachara, ọ ga-ebilitekwa n’ọnwụ. Ọ kọọrọ ha ihe a n’ezoghị ọnụ. Pita kpọọrọ ya gaa n’akụkụ malite ị bara ya mba.

Ma Jesu tụgharịrị, lee ndị na-eso ụzọ ya anya, wee baara Pita mba, sị, “Gafee m n’azụ, Ekwensu! N’ihina uche gị abụghị uche nke Chineke kama ọ bụ uche nke mmadụ!”

Igbo Mass Readings for February 17 2028, Tọọzde n’ime Izuụka nke Isii N’Oge Adanyeghị n’Emume.