Igbo Mass Readings for March 26 2024, Tuzde n’ime Izuụka dị Asọ

Nke a bụ Igbo Mass Readings for March 26 2024, Tuzde n’ime Izuụka dị Asọ.

IHE ỌGỤGỤ NKE MBỤ – 49:1-6

Ihe Ọgụgụ e wetara n’Akwụkwọ onye amụma Aịzaya

Geenụ m ntị, O, ala ndị dị n’akụkụ mmiri, ụnụ ndị bi ebe tere aka, geenụ ntị. Chineke họọrọ m site n’afọ nne m, ọ kpọrọ m aha tupu a mụọ m. O meela ọnụ m ọ dị nkọ ka mmaagha.

O zoro m n’okpuru aka ya; o mere m ka m bụrụ akụ a pịrị nke ọma; ọ na-echekwa m n’ime ọbọ ya. Ọ sịrị m “Ị bụ nwaodibo m, Izrel, onye m ga-esi na ya nweta otito.

Mana ekwuru m sị, ataala m ahụhụ lara n’iyi, emefuola m ike m n’ihe na-abaghị uru; mana ihe nketa m dị n’Osebụrụwa. Ụgwọ ọrụ m dị na Chineke.

Ma ugbu a Yahweh, onye kpụrụ m n’ime afọ nne m, ka m bụrụ nwodibo ya, ka m kpọghachiri ya Jekọb azụ, ka m chịkọtara ya Izrel, maka na-enwere m nsọpụrụ n’ihi ya, onye bụ ike m, kwuru sị,

“Ọ bụghị naanị na ị bụ nwodibo m ka I were kpọlite agbụrụ Jekọb kpọghachi ụmụ Izrel ndị fọdụrụ ụnụ; Aga m eme gị ihe nke mba niile ka nzọpụta were ruo na nsọtụ nke ụwa.”

ABỤỌMA NA AZỊZA – Ps. 71: 1-2,3-4, 5-6, 15,17.

Azịza: Aga m ekwe ukwe nzọpụta gị.

1. Na gị, Onyenweanyị ka m gbabara,

ekwela ka ihere mee m.

N’eziomume gị gbapụta m, zọpụta m,

gee m ntị ma zọpụta m! Azịza

2. Bụrụ okwute nke mgbaba m,

mgbidi aja nke ga-azọpụta m!

N’ihi na ị bụ okwute m, nchedo m.

Chineke m, zọpụta m n’aka ndị ajọ mmadụ. Azịza

3. N’ihi na sọ gị, Onyenweanyị bụ nchekwube m,

Onyenweanyị, echekwubere m na gị,

bido na mgbe m dị n’okorobịa,

Atụkwasara m gị obi bido na mgbe a mụrụ m,

Ị bụrịị oke nke m site n’afọ nne m. Azịza

4. Ọnụ m ga-ekwupụta eziomume na ike nke nzọpụta gị ụbọchị niile,

Aga m Chineke, abia na ike nke Onyenweanyi, O

Ị kuziiri m bido na nwata m,

aga m na-ekwupụta ọrụ ebube gị. Azịza

MBEKU

R/ Otito na ebube dịrị Gị, O Dinwenụ, Jesu Kristi.

Ekele dịrị gị Eze anyị, onye rubeere Nna ya isi, Ọ naara ọnwụ ya n’elu obe dịka ezi nwatụrụ.

R/ Otito na ebube dịrị Gị, O Dinwenụ, Jesu Kristi.

OZIỌMA – 13:21-33, 36-38.

Ihe Ọgụgụ e wetara n’Oziọma dị asọ nke Jọn dere.

Ka Jesu na ndị na-eso ụzọ ya ka nọ na nri anyasị, mgbe O kwuchara ihe ndị a, O wutere ya n’obi. O wee kwupụta sị, “N’ịgwa ụnụ eziokwu, otu onye n’ime ụnụ ga-arara m nye.”

Ndị na-eso ụzọ ya lerịtara onwe ha anya, na-atụle onye n’ime ha ọ na-ekwu maka ya. Otu onye n’ime ndị na-eso ụzọ ya, onye Jesu hụrụ n’anya dabeere nso n’obi Jesu.

Nke a mere Saịmọn Pita ji kweere ya n’isi sị ya, “Jụọ ya onye ọ na-ekwu maka ya.” Ebe ọ dabere nso n’obi Jesu ọ jụrụ ya sị, “Onyenweanyị, onye ka ọ bụ?”

Jesu zara ya sị, “Ọ bụ onye ahụ m ga-esuru iberibe achịcha na mmanya nye.” Mgbe o suuru iberibe achịcha ahụ na mmanya, o nyere ya Judas nwa Saịmọn Iskarịọt.

Mgbe Judas richara iberibe achịcha ahụ, ekwensu banyere ya n’ime ya. Jesu asị ya, “Ihe ọbụla ị ga-eme, mee ya ọsịsọ.” Ọ dịghị onye ọbụla n’ime ndị so ha nọrọ n’oche nri matara ihe Jesu ji kwuo otu a.

Ebe ọ bụ na Judas bụ ojide ego, ụfọdụ chere na Jesu na-asị ya, “Zụta ihe ndị dị anyị mkpa maka emume a,” ma ọ bụ “Nye ogbenye ihe.” Mgbe Judas natachara iberibe achịcha ahụ, Ọ pụrụ ozigbo.

Ọchịchịrị agbaa. Mgbe Judas pụrụ, Jesu sịrị, “Ugbu a ka e nyere Nwa nke mmadụ otito. Enyekwara Chineke otito n’ime ya. Ọ bụrụ na e nye Chineke otito n’ime ya, Chineke ga-enyekwa ya otito n’ime onwe ya.

Ọ ga-enyekwa ya otito ahụ ngwa-ngwa. Ụmụntakịrị, Ọ fọdụrụ nwantịntị oge mụ na ụnụ ga-anọ. Ụnụ ga-achọ m, ma ihe m gwara ndị Juu ka m na-agwa ụnụ ugbu a. ‘Ebe m na-aga, ụnụ agaghị abịali ya.

Saịmọn Pita jụrụ ya sị, “Onyenweanyị olee ebe ị na-ala?” Jesu zara ya sị, “Ebe m na-ala, i nweghị ike iso m ugbu a. Ma ị ga-eso m ma e mechaa. Pita sịrị ya, “Onyenwe m gịnị mere na m apụghị iso gị ugbu a?

Aga m anwụ n’ihi gị.” Jesu zara ya sị, “Ị ga-anwụ n’ihi m? N’ịgwa gị eziokwu, tupu okeọkpa akwaa, ị ga-agọnahụ m ugboro atọ.

Igbo Mass readings for March 27 2024, Wenezde n’ime Izuụka dị Asọ

Igbo Mass Readings for March 26 2024, Tuzde n’ime Izuụka dị Asọ.

Catholic Sunday and Daily Mass Readings for 2024 (Kindle eBook & Paperback)

X
Scroll to Top
error: Alert: Content is protected !!

Receive Daily Mass Readings and Reflections via Email

You have successfully subscribed to the newsletter

There was an error while trying to send your request. Please try again.

Catholic Lectionary will use the information you provide on this form to be in touch with you and to provide updates and marketing.