Igbo Mass Readings for January 17 2023, Tuezde n’ime Izuụka nke Abụọ N’Oge Adanyeghị n’Emume.

Nke a bụ Igbo Mass Readings for January 17 2023, Tuezde n’ime Izuụka nke Abụọ N’Oge Adanyeghị n’Emume.

IHE ỌGỤGỤ NKE MBỤ – 6:10-20

Ihe Ọgụgụ Ewetara N’akwụkwọozi E Degaara Ndị Hibru

Chineke abụghị onye na-emejọ mmadụ nke na ọ ga-eleghara ọrụ na ịhụnaanya ụnụ gosiri n’ihi ya site n’ịgara ndị dị nsọ ozi dịka ụnụ ka na-eme. Ọ na-agụ anyị agụụ ka onye ọbụla n’ime ụnụ na-egosi otu ịnụ ọkụ n’obi ahụ n’inwezu ihe niile ụnụ na-atụ anya ya mgbe niile n’uju.

Anyị na-achọ ka ụnụ ghara ịbụ ndị ike gwụrụ kama ka ụnụ bụrụ ndị na-eñomi ndị ahụ jiri okwukwe na ntachiobi mata ihe ahụ Chukwu kwere na nkwa.

Ebe ọ bụ na o nweghị onye karịrị Chineke ọ ga-eji ñụọ iyi mgbe o kwere Abraham nkwa, o jiri onwe ya ñụọ iyi, sị, “N’eziokwu, aga m agọzị gị mekwaa ka ị bawanye”. Abraham nwere ndidi, wee natakwa ihe Chukwu kwere ya na nkwa.

Ndị mmadụ na-eji ihe ka ha elu añụ iyi, ha na-ejikwa ịñụ iyi edozi esemokwu niile na-adị n’etiti mmadụ na ibe ya. Mgbe Chukwu chọrọ ime ka nzube ya na-adịghị agbanwe agbanwe wee ndị ahụ ga-eketa nkwa ahụ anya nke ọma, o jiri ịñụ iyi mee nke a.

Ka ọ ga-abụ site n’ihe abụọ na-enweghị mgbanwe, nke na-agaghị ekwe omume ịhụ Chineke dịka onye ụgha, anyị bụ ndị gbara ọsọ ndụ ga-enweta agbamume siri ike were jide nchekwube e dobeere anyị.

Anyị nwere nke a dịka ebe ndabere kwụdosiri ike nke obi anyị, olileanya na-abanye n’ime ime ebe nchụaja, ebe Jesu buuru anyị ụzọ gaa dịka onye nnọchite anya anyị. Ọ bụrụla nnukwu ụkọchukwu ebeebe n’usoro nke Melkizedek.

ABỤỌMA NA AZỊZA – Ps. 111:1-2, 4-5, 9-10.

Azịza: Onyenweanyị anaghị echezọ ọgbụgbandụ ya.

1. Alleluịa, Eji m obi m niile enye Onyenweanyị ekele,

n’ọgbakọ ndị eziomume.

Ọrụ Onyenweanyị niile dị ịtụnaanya,

ndị niile ọ na-amasị kwesịrị ilekwasa ya anya. Azịza

2. Ọ na-ekwe ka anyị na-echeta ọrụ ebube ya.

Onyenweanyị dị ebere dị obiọma,

Ọ na-enye ndị na-atụrụ ya egwu nri,

ọ naghị echezo ọgbụgbandụ ya. Azịza

3. Ọ na-abịa ịgbapụta ndị nke ya ọsọọsọ,

na-enye ọgbụgbandụ ya otu mgbe,

aha ya dị nsọ,

kwesị na anyị ga-atụrụ ya egwu. Azịza

4. Ịtụ egwu nke Onyenweanyị nke a bụ mbido amamihe,

ha nwere uche ziri ezi bụ ndị na-eme ya.

A ga-ekwe ukwe otito ya ebeebe. Azịza.

MBEKU

Alleluia, Alleluia:

Nye m nghọta ka m wee mata iwu gị, wee nwee ike iji obi m niile dobe iwu gị.

Alleluia.

OZIỌMA – 2:23-28

Ihe Ọgụgụ nke a si n’Oziọma dị asọ nke Mak dere.

N’otu ụbọchị Sabat, Jesu na ndị na-eso ụzọ ya si n’ụzọ nta dị n’etiti ubi ọka na-agafe. Mgbe ha na-aga, ndị na-eso ụzọ ya malitere ịghọ ọka.

Ma ndị Farisii sịrị ya, “Lee anya! Gịnị mere ndị na-eso ụzọ gị ji eme ihe na-ezighi ezi n’iwu n’ụbọchị Sabat?”.

Ma ọ jụrụ ha sị, “Ọ bụ na ụnụ agụbeghị ihe Devid mere mgbe ọ nọ na mkpa, mgbe agụụ gụrụ ya na ndị ya na ha so: Ka o si banye n’ụlọnsọ Chineke, mgbe Abịata bụ onyeisi nchụaja, rie ogbe achịcha a na-eche n’ihu Chineke, nyekwa ndị ya na ha so, nke na-ezighi ezi n’iwu ka onye ọbụla rie, belusọ onyeisi nchụaja?”

Ọ gwara ha sị, “E dobere ụbọchị Sabat maka ọdịmma nke mmadụ; e meghị mmadụ n’ihi ụbọchị Sabat. Ya mere Nwa nke mmadụ bụ Onyenwe ọ bụladị ụbọchị Sabat”.

Igbo Mass Readings for January 17 2023, Tuezde n’ime Izuụka nke Abụọ N’Oge Adanyeghị n’Emume.