Igbo Mass Readings for February 21 2023, Tuezde n’ime Izuụka nke Asaa N’Oge Adanyeghị n’Emume.

Nke a bụ Igbo Mass Readings for February 21 2023, Tuezde n’ime Izuụka nke Asaa N’Oge Adanyeghị n’Emume.

IHE ỌGỤGỤ NKE MBỤ – 2:1-11

Ihe Ọgụgụ e wetara n’akwụkwọ Sịrak

Nwa m, ọ bụrụ na ị na-achọ ka i fee Yahweh nke ọma, dị nkwadebe maka ọnwụnwa. Bụrụkwa onye obi ya dị ọcha, kwụrụ ọtọ, kwụsikwa ike, dịrị jụụ mgbe ọgbaaghara bịara. Makụọ Yahweh, a hapụkwala ya, ka i wee nwee ugwu n’isi njedebe nke ndụ gị.

Nabata ihe ọbụla nke ga adakwasị gị, were ndidi nara mgbanwoga nke nwere ike itinye gị n’ọnọdụ dị ala. Otu e si anwale ọlaedo n’ime ọkụ, otu ahụkwa ka e si anwale ezigbo mmadụ na mkparị.

Tụkwasị Yahweh obi, Ọ ga-enyere gị aka, mee ụzọ gị ka ha kwụrụ ọtọ, nchekwube gị bụrụ na ya. Ụnụ bụ ndị na-atụrụ Yahweh egwu, cherenụ ebere ya, ụnụ agbakụtala ya azụ, ka ụnụ ghara ịda.

Ụnụ bụ ndị na-atụrụ Yahweh egwu, tụkwasịnụ ya obi; n’ezie, ụnụ ga-anata ezi ụgwọ ọrụ ụnụ. Ụnụ bụ ndị na-atụrụ Yahweh egwu, leenụ anya iheọma, añụrị ebighịebi na ebere.

Chekwaanụ maka ndụdụgandụ gachara aga, o nweela onye tụkwasịrị Yahweh obi e tinyere n’ihere? Mọbụ onye kwụsiri ike n’ime egwu nke Yahweh Ọ gbakụtara azụ?

Mọbụ onye nke kpọkuru ya, O leghaara anya? Maka na Yahweh bụ onye obi ọma, bụrụkwa onye obiebere; Ọ na-agbaghara njọ, na-azọpụtakwa n’oge ahụhụ.

ABỤỌMA NA AZỊZA – Ps. 37:3-4,18-19,27-28,39-40

Azịza: Tụkwasịobi gi n’Onyenweanyị, ọ ga-enyekwara gị aka.

1. Tụkwasịobi gị n’Onyenweanyị ma mebe mma

ka I wee biri na-ala ebe obibi gị ma nwee udo.

Nwebe añụrị n’ime Onyenweanyị

ka O wee nye gị ihe obi gị na-achọ. Azịza

2. Onyenweanyị na-echekwa ndụ ndị eziomume

ihe nketa ha ga-adịgide ebeebe.

Ha agaghị ata ahụhụ n’oge ihe siri ike,

n’oge oke agụụ, ha ga-enwe ihe oriri n’uju. Azịza

3. Zere njọ, ma mebe mma,

ka i wee nweta ụlọ dị ebeebe,

N’ihina Onyenweanyị hụrụ ihe ziri ezi n’anya.

Ọ naghị ahapụ ndị kwere na ya. Azịza

4. Nzọpụta nke ndị eziomume na-esi n’aka Onyenweanyị abịa,

Ọ na-echekwaba ha n’oge nsogbu;

Onyenweanyị na-enyere ha aka, na azọpụtakwa ha

Ọ na-azọpụta ha n’ihina ọ bụ onye nchedo ha. Azịza

MBEKU – James 1:18

Alleluia, Alleluia:

Site n’uche nke aka ya, o jiri okwu nke eziokwu ahụ mee ka anyị pụta iche. Meekwa ka anyị bụrụ ụdị mkpụrụ mbụ nke ihe o kere eke.

Alleluia.           

OZIỌMA – 9:30-37

Ihe Ọgụgụ nke a si n’Oziọma dị asọ nke Mak dere

Jesu na ndị na-eso ụzọ ya esi n’elu ugwu ahụ rịdata. Ha si n’ebe ahụ pụọ, site n’obodo Galili gafee. Ma Jesu achọghị ka onye ọbụla mara ebe ọ nọ. N’ihina ọ na-akụziri ndị na-eso ụzọ ya sị, “A ga-arara Nwa nke mmadụ nye n’aka ndị mmadụ.

Ha ga-egbu ya. Ma mgbe ha gbuchara ya ọ ga-ebili mgbe ụbọchị atọ gachara. Ndị na-eso ụzọ ya aghọtaghị isi okwu a. Ma egwu ekweghị ha ajụ ya ajụjụ. Ha bịaruru Kapanaum.

Mgbe Jesu banyere n’ime ụlọ, ọ jụrụ ndị na-eso ụzọ ya, sị, “Gịnị ka ụnụ na-ekwurịta n’ụzọ?” Ma ha gbara nkịtị, n’ihina ha na ekwurịta n’ụzọ banyere onye kacha ibe ya n’etiti ha.

Jesu nọdụrụ ala kpọọ mmadụ iri na abụọ ahụ. Ọ sịrị ha, “Ọ bụrụ na onye ọbụla na-achọ ka ọ bụrụ onye mbụ, ọ ga-edebe onwe ya ka onye ikpeazụ n’etiti ụnụ, ọ ga-abụkwa nwodibo ụnụ niile”.

O kuru otu nwatakịrị, guzobe ya n’etiti ha. O kukwaara ya ọzọ n’aka abụọ, gwa ndị na-eso ụzọ ya, sị, “Onye ọbụla nke nabatara otu n’ime ụmụntakịrị dị otu a n’aha m, mụ onwe m ka ọ nabatara, onye ọbụla nke nabatara m, ọ bụghị m ka ọ nabatara, kama ọ nabatara onye zitere m”.

Igbo Mass Readings for February 22 2023, Wednezde Ntụ

Igbo Mass Readings for February 21 2023, Tuezde n’ime Izuụka nke Asaa N’Oge Adanyeghị n’Emume.