Igbo Mass Readings for January 24 2023, Tuezde n’ime Izuụka nke Atọ N’Oge Adanyeghị n’Emume.

Nke a bụ Igbo Mass Readings for January 24 2023, Tuezde n’ime Izuụka nke Atọ N’Oge Adanyeghị n’Emume.

IHE ỌGỤGỤ NKE MBỤ – 10:1-10

Ihe Ọgụgụ Ewetara N’akwụkwọozi E Degaara Ndị Hibru

Otu ọ bụ na iwu nwere naanị onyinyo nke ezi ihe ndị ahụ ga-abịanụ, nke na-abụghị ezi ihe ndị ahụ n’onwe ha, o nweghị ike isite n’otu ụdị aja ahụ nke a na-achụ mgbe niile site n’afọ ruo n’afọ, mee ka ndị niile na-abịa ya nso zuo oke.

Ma ọ bụghị otu a, ọ bụ na a gabeghị akwụsị ịchụ aja ndị a? Ọ bụrụ na a wụchapụla njọ ndị na-efe ofufe na mbụ, uche ha agaghịkwa adị na njọ ọzọ. Aja ndị a na-echetara ndị mmadụ njọ ha kwa afọ. Ọ bụ ihe agaghị ekwe omume na ọbara oke ehi na ewu ga-asachapụ njọ.

N’ihi nke a, mgbe Kristi bịara n’ụwa o kwuru sị, “Ọ bụghị aja na onyinye ka ị chọrọ, kama ọ bụ ahụ ka ị kwadobeere m”. Aja nsureọkụ na aja mgbaghara njọ anaghị enye gị obi ụtọ.

Mgbe ahụ ka ma kwuru sị “Lee, abịara m ime uche gị, O Chukwu, dịka e dere banyere m n’akwụkwọ nsọ”. O kwuru na mbụ sị, “Aja onyinye, aja nsureọkụ na aja mgbaghara njọ adịghị amasị gị nke ha na-enye gị obi ụtọ”.

(A chụrụ aja ndị a dịka iwu si dị). O kwukwara sị, “Lee, abịara m ime uche gị”. Chineke emebiela aja mbụ iji malite nke abụọ.

Site n’ime ya bụ uche Chineke, e mere ka anyị dị ọcha site n’aja ahụ Jesu ji onwe ya wee chụọ naanị otu ugboro.

ABỤỌMA NA AZỊZA – Ps. 40:1, 3, 6-7, 9-10.

Azịza: Anọ m ebe a, Dinwenụ; abịara m ime uche gị

1. Echere m, echere m Onyenweanyị,

O wee hulata gee m ntị, nụrụ akwa enyemaka m

na-ebe O tinyere ukwe ọhụrụ n’ọnụ m,

otito nke Chukwu anyị. Azịza

2. Ị naghị achọ ịchụ aja mọbụ ihe nrunye,

kama ntị ghe oghe.

Ị naghị achọ aja nsureọkụ mọbụ aja maka njo,

kama e kwuru m sị, “Anọ m ebe a, ana m abịa.” Azịza.

3. Ekwupụtala m eziomume nke Onyenweanyị

na nnukwu ọgbakọ

Lee, emechighị m ọnụ m,

ị maara nke a O Onyenweanyị. Azịza

4. O nwebeghị mgbe m jụrụ ikwupụta eziomume gị.

kama ekwupụtala m nkwụdosiike na enyemaka nzọpụta gị.

Ahapụbeghị m ikwupụta ịhụnaanya na nkwụdosiike gị

n’ihu nnukwu ọgbakọ. Azịza

MBEKU

Alleluia, Alleluia.

Ekwela ka ma soro ụzọ na-akwụghị ọtọ, ma nye m amara nke iwu gị.

Alleluia.

OZIỌMA – 3:31-35

Ihe Ọgụgụ nke a si n’Oziọma dị asọ nke Mak dere

Nne Jesu na ụmụnne ya bịara guzoro n’ezi, zie ozi ka a kpọọ ya. Igwe mmadụ gbakwara ya gburugburu. Ụfọdụ n’ime ha gwara ya sị, “Nne gị na ụmụnne gị nọ n’ezi na-achọ gị”.

Ma ọ zara ha sị, “Onye bụ nne m na ụmụnne m? O lechara ndị gbara ya gburugburu anya sị, “Ndị a bụ nne m na ụmụnne m! Onye ọbụla na-eme uche Chineke bụ nwanne m nwoke, nwanne m nwaanyị na nne m”.

Igbo Mass Readings for January 24 2023, Tuezde n’ime Izuụka nke Atọ N’Oge Adanyeghị n’Emume.