Igbo Mass Readings for September 19 2023, Tuezde n’ime Izuụka nke Iri Abụọ na Anọ N’Oge Adanyeghị n’Emume.

Nke a bụ Igbo Mass Readings for September 19 2023, Tuezde n’ime Izuụka nke Iri Abụọ na Anọ N’Oge Adanyeghị n’Emume.

IHE ỌGỤGỤ NKE MBỤ – 3:1-13

Ihe Ọgụgụ e wetara n’akwụkwọozi mbụ Pọl degaara Timoti

Okwu a kwesịrị ntụkwasịobi: Ọ bụrụ na onye ọbụla na-achọ ịbanye n’ọnọdụ nke nnukwu ụkọchukwu, ọ bụ ọrụ kwesịrị nsọpụrụ ka ọ na achọ.

Nnukwu ụkọchukkwu ọbụla ga-abụ onye ndu ya n’enweghị ntụpọ ọbụla, di nke otu nwaanyị, onye anya doro, onye uche ya zuru oke, onye dị ebube n’anya, onye na-anabata ndị ọbịa na onye nwere ike ikuzi ihe nke ọma.

Ọ gaghị abụ onye na-añụbiga mmanya oke, onye na-ana mmadụ ihe ya n’ike, onye okwu na ụka, na onye hụrụ ego n’anya; kama ọ ga-abụ onye dị nwayọọ na-achọ udo.

Ọ ga-abụrịrị onye na-achị ezinụụlọ ya nkeọma, mee ka ụmụ ya jiri nrubeisi na nsọpụrụ nọdụ n’ebe niile. N’ihina ọ bụrụ na mmadụ amaghị otu ọ ga-esi achị ezinụụlọ ya, kedụ ka ọ ga-esi elekọta nzukọ Chineke anya nkeọma?

Ọ gaghị abụ onye a tọghatara ọhụrụ, ka ọnọdụ ya ghara ibu ya isi, nke ga-eme ka ọ daba n’ọmụma ikpe nke Ekwensu.

Ọzọkwa, ọ ga-abụrịrị onye mmadụ niile na-eche echiche ọma maka ya, ka ọ ghara ịdaba n’ọnya Ekwensu na n’ihe ịtaụta.

Otu aka ahụ, ndị Dikin ga-ehi aka n’anya ghara ị bụ ndị ireabụọ, ndị na-anaghị añụbiga mmanya oke na ndị na-ejighị anyaukwu na-achọ oke uru.

Ha ga-abụrịrị ndị weere ezi akọnuuche jide ihe omimi niile nke dị n’okwukwe anyị. Ka e burukwa ụzọ nwalee ha, ọ bụrụ na e nweghị ebubo ọbụla chie ha dikin, maka ịgba odibo.

N’otu aka ahụ, ndị nwaanyị ga-ehikwa aka n’anya, ha agaghị abụ ndị na-agba asịrị, kama anya ga-edo ha, ha ekwesịkwa ntụkwasịobi n’ihe niile. Ka onye dikin ọbụla bụrụ di otu nwaanyị, na-achị ụmụ ya na ezinụụlọ ya nkeọma.

N’ihina ndị ọbụla rụrụ ọrụ ha nkeọma dịka ndị dikin na-enwetara onwe ha ezigbo ọkwa, na nnukwu ntụkwasịobi n’okwukwe ahụ nke dị n’ime Jesu Kristi.

ABỤỌMA NA AZỊZA – Ps. 101: 1-2, 2-3, 5, 6

Azịza: Agam ebi ndụ n’enweghị ntụpọ

1. Aga m abụ abụ maka nkwụdosiike

nke ịhụnaanya na ikpe nkwụmọtọ gị

Gị ka m ga-abụrụ ya O Onyenwe m

Aga m agba mbọ ka m bie ndụ n’enweghị ntụpọ,

Olee mgbe Ị ga-abịakwute m? Azịza

2. Aga m eji obi dị ọcha biri n’ụlọ m;

Anya m agaghị aga n’ebe ihe ọjọọ dị

Akpọrọ m agwa ndị niile enweghị asị

Mụ na ha agaghị enwe mmekọ ma ọlị. Azịza

3. Onye ọbụla ji mmadụ ibe ya agba asịrị,

Aga m egbu ya

Agaghị m edi agwa ndị mpako na ndị nganga ma ọlị. Azịza

4. Aga m egosị ndị niile kwesịrị ntụkwasịobi n’ala ahụ afọma

Mụ na ha ga-ebi

Naanị ndị ụzọ ha kwụ ọtọ ga agbara m odibo. Azịza

MBEKU – Jọn 6:64, 69

Alleluia, Alleluia:          

Dinwenụ, okwu gị bụ mmụọ bụrụkwa ndụ, Ọ bụ gịnwa ji okwu nke ndụ ebeebe.

Alleluia

OZIỌMA – 7:11-17

Ihe Ọgụgụ nke a si n’Oziọma dị asọ nke Luk dere

Ka nwa oge gachara, Jesu gara n’otu obodo a na-akpọ Nain; ndị na-eso ụzọ ya na igwe mmadụ sokwa ya. Ma ka ọ na-abịaru n’ọnụụzọ ama nke obodo ahụ, e nwere otu nwoke nwụrụlarịị nke a na-ebupụ, otu nwa nke nne ya mụrụ, nne ya ahụ bụ nwaanyị ajadu, oke igwe mmadụ si n’obodo ahụ sonyekwara nwaanyị ahụ.

Mgbe Onyenweanyị hụrụ ya, O meere ya ebere wee sị ya, “Ebela akwa.” Ya bịaruo nso metụ igbe ozu ahụ aka, ndị bu ozu ahụ wee guzo; Jesu wee sị, “Nwaokorobịa!

Ana m asị gị bilie!” Nwaokorobịa ahụ nwụrụ anwụ nọlitere, ma bidokwa ikwu okwu; Jesu kpọọrọ ya nye nne ya.

Ụjọ jidere ha niile; nke mere ha ji too Chineke na-asị, “Nnukwu onye amụma ebilitela n’etiti anyị. Ọzọ, Chineke abịala ileta ndị nke ya!” Akụkọ a gbasara Jesu gazuru n’ala Judia na obodo niile gbara ya gburugburu.

Igbo Mass Readings for September 19 2023, Tuezde n’ime Izuụka nke Iri Abụọ na Anọ N’Oge Adanyeghị n’Emume.