Igbo Mass Readings for March 28 2023, Tuezde n’ime Izuụka nke Ise n’Oge Ncheta Ahụhụ Kristi

Nke a bụ Igbo Mass Readings maka March 28 2023, Tuezde n’ime Izuụka nke Ise n’Oge Ncheta Ahụhụ Kristi.

IHE ỌGỤGỤ NKE MBỤ – 21:4-9

Ihe Ọgụgụ e wetara n’Akwụkwọ Ọnụọgụgụ.

Ndị Izrel siri n’ugwu Họọ bilie ije, si n’ụzọ osimiri Mediterenia gaa Edọm gburugburu. Ma mgbe ha na-aga n’ụzọ, ha nwere nkolopu obi. Ha tamuru megide Chineke na Mosis sị, “Gịnị mere i ji kpọpụta anyị n’Ijipt, ka anyị nwụchaa n’ịkpa ebe a?

Ihe oriri adịghị na ya. Ihe ọñụñụ adịghịkwa. Otu ụdị nri nke a na-atọ bụrịbụrị agbụla anyị!” Ya mere Yahweh zitere n’etiti ha ọtụtụ agwọ na-acha ka ọkụ nke nwekwara elo ọjọọ.

Agwọ ndị a tagburu ọtụtụ n’ime ha. Ya mere, ụmụ Izrel bịakwutere Mosis sị ya, “Anyị emehiela. N’ihina anyị kwutọrọ gị na Yahweh. Biko rịọrọ anyị Yahweh, ka o wepụrụ anyị agwọ ndị a.

Mosis kpeere ndị Izrel ekpere. Yahweh gwara Mosis ka o were ọla, kpụọ agwọ na-acha ka ọkụ, kokwasa ya n’okporo osisi ọkọlọtọ, ka onye ọbụla agwọ ahụ tara lere anya na ya wee dị ndụ.

Ya mere, Mosis kpụrụ agwọ ọlaọkụ kokwasa ya n’okporo osisi ọkọlọtọ. Onye ọbụla agwọ ahụ tara, legidekwara agwọ ọlaọkụ ahụ anya, nwetakwara ahụ ike.

ABỤỌMA NA AZỊZA – Ps. 102:2-3, 16- 18, 19-21.

Azịza: Onyenweanyị nụrụ ekpere m, ka mkpu akwa m ruo gị ntị.

1. Onyenweanyị nụrụ ekpere m,

ka mkpu akwa m ruo gị ntị.

Ewepụkwala ihu gị n’ebe m nọ,

mgbe m nọ na nsogbu,

Gee m ntị,

mgbe m kpọrọ gị, zaa m ọsọọsọ! Azịza

2. Mba niile ga-atụ aha nke Onyenweanyị egwu,

ndị eze ụwa niile ga-asọpụrụ otito gị;

N’ihi na Onyenweanyị ga-arụgharị Zayọn,

mekwaa ka a hụ ebube ya.

Ọ ga-aza ekpere ndị ogbenye,

ọ gaghị ajụ arịrịọ ha. Azịza

3. Ka edebaa ihe ndị a n’akwụkwọ,

maka agbụrụ ndị ga-abịa n’ihu,

ka ndị niile amụbeghị amụ were nwee ike too Onyenweanyị.

Onyenweanyị sitere n’ebe nke ya dị asọ were ledata anya,

O sitere n’eluigwe na-ele ụwa anya,

ka o were nụrụ ude ndị nọ na mkpọrọ na-asụ,

ka o were tọhapụ ndị amara ikpe ọnwụ. Azịza

MBEKU – Jọn 8:12.

R/ Otito na ebube dịrị Gị, O Dinwenụ, Jesu Kristi.

Jesu gwara ha okwu ọzọ sị: “Abụ m ihe nke ụwa, onye ọbụla na-eso m agaghị aga n’ọchịchịrị, kama ọ ga-enwe ihè nke ndụ.

R/ Otito na ebube dịrị Gị, O Dinwenụ, Jesu Kristi.

OZIỌMA – 8:21-30.

Ihe Ọgụgụ e wetara n’Oziọma dị asọ nke Jọn dere.

Jesu gwakwara ndị Farisii ọzọ sị, “Aga m apụ, ụnụ ga-achọkwa m, ma ụnụ ga-anwụ na mmehie ụnụ; ebe m na-aga, ụnụ enweghị ike ịbịa.” Ndị Juu wee kwuo sị, “Ọ ga-egbu onwe ya?

Ebe ọ bụ na ọ sị, ‘Ebe m na-aga ụnụ enweghị ike ịbịa?” Ọ gwara ha sị, “Ụnụ si n’ala, ma esi n’elu, ụnụ bụ nke ụwa a, ma abụghị m nke ụwa a. Agwara m ụnụ na ụnụ ga-anwụ na mmehie ụnụ, ụnụ ga- anwụ na mmehie ụnụ belụsọ ma ụnụ kwenyere na m bụ onye ahụ.”

Ha jụrụ ya sị, “Onye ka ị bụ?” Jesu zara ha sị, “Abụ m ihe ahụ m na-agwa ụnụ site na mbụ. Enwere m ọtụtụ ihe m ga-ekwu na ọtụtụ ihe m ga-ekpe banyere ụnụ. Ma onye zitere m bụ onye eziokwu.

Ihe m nụrụ n’aka ya ka m na-ekwupụtara ụwa.” Ha aghọtaghị na Jesu na-agwa ha banyere Nna ya. Jesu sịrị ha, “Mgbe ụnụ ga-ewelitecha Nwa nke mmadụ elu, ụnụ ga-amata na abụ m onye ahụ; na-adịghị m eme ihe ọbụla n’ike aka m, kama ana m ekwu dịka Nna si kuziri m.

Onye nke zitere m nọnyeere m. Ọ hapụbeghị sọ m, n’ihi na ana m eme ihe na-amasị ya mgbe niile. Mgbe ọ na-ekwu okwu ndị a, ọtụtụ mmadụ kwenyere na ya.

Igbo Mass readings for March 29 2023, Wednezde n’ime Izuụka nke Ise n’Oge Ncheta Ahụhụ Kristi.

Igbo Mass Readings for March 28 2023, Tuezde n’ime Izuụka nke Ise n’Oge Ncheta Ahụhụ Kristi.