Igbo Mass Readings for April 17 2024, Wenezde Izuụka nke Atọ n’oge Mbilite n’Ọnwụ Kristi

Nke a bụ Igbo Mass Readings for April 17 2024, Wenezde Izuụka nke Atọ n’oge Mbilite n’Ọnwụ Kristi.

IHE ỌGỤGỤ NKE MBỤ – 8:1-8

Ihe Ọgụgụ ewetara n’Ọrụ Ndịozi

N’oge ahụ oke ogbugbu ndị kwerenụ dakwasịrị ndị otu Kristi dị na Jerusalem. Ndị niile kwere na Kristi ma e wepụ ụmụazụ gbasara n’ala Judia na Sameria niile.

Ụfọdụ ụmụnwoke na-atụ egwu Chineke liri Stivin, ruoro ya uju nke ukwu. Sọl gbara mbọ nke ukwu ime ka nzukọ Kristi daa. Ọ na-aba n’ụlọ ndị mmadụ n’otu n’otu na-akpụpụta ndị kwere ekwe, ụmụnwoke na ụmụnwaanyị, na-atụba ha n’ụlọ mkpọrọ.

Ugbu a, ndị ahụ kwere na Kristi, ndị si na Jerusalem gbasachaa, jegharịrị ebe niile, na-agbasa okwu Chineke. Filip gara n’otu obodo dị na Sameria gwa ha maka Kristi.

Igwe ndị obodo ahụ nabatara ozi Filip mgbe ha nụrụ ma hụkwa ihe ịrịbaama dị iche-iche o mere. Ọtụtụ mmụọ ọjọọ si n’ahụ ndị ha ji pụta, were oke olu na-eti mkpu.

O mekwara ka ahụ dị ọtụtụ mmadụ mma, ma ndị akụkụ ahụ ha nwụrụ anwụ ma ndị dara ngwọrọ. Nke a wetara oke ọñụ n’obodo ahụ.

ABỤỌMA NA AZỊZA – Ps. 66:1-3, 4-5, 6-7.

Azịza: Ụwa niile tikuenụ Chineke mkpu ọñụ.

1. Tikuenụ Chineke mkpu ọñụ, ụwa niile,

tierenụ aha ya dị otito egwu,

jirinụ ịja mma ụnụ nye ya otito.

Sịnụ Chineke, lee ka I si dị oke egwu! Azịza

2. Ụwa niile na-akpọ isiala nye gị,

na-akụrụ gị egwu,

na-akụ egwu na-asọpụrụ aha gị.

Bịa lee ọrụ ịtụnaanya Chineke rụrụ,

O kwesịrị ịtụ egwu n’ihi ọrụ ya n’etiti ụmụ mmadụ. Azịza

3. O mere ka osimiri ghọọ ala kpọrọ nkụ,

ha ji ụkwụ gafee osimiri ahụ!

N’ihi ya ka anyị ñụrịa n’ime ya.

Onye ji ike ya achị mgbe ebighịebi. Azịza

MBEKU

ALLELUIA ALLELUIA:

Kristi ebiliela ma chakwasịkwa anyị, ndị O ji ọbara Ya wee gbapụta.

ALLELUUIA.

OZIỌMA – 6:35-40.

Ihe Ọgụgụ ewetara n’Oziọma dị asọ nke Jọn dere.

Jesu gwara igwe mmadụ ahụ sị, “Abụ m achịcha nke ndụ; onye na-abịakute m agụụ agaghị agụ ya, onye na-ekwerekwa na m, akpịrị agaghị akpọ ya nkụ.

Ana m agwa ụnụ, na ụnụ ahụla m, mana ụnụ ekweghị. Onye ọbụla Nna m na-enye m, ga-abịakwute m. Agaghị m achụpụkwa onye ọbụla nke na-abịakwute m.

N’ihi na-esighị m n’eluigwe bịa ime uche m, kama ọ bụ ime uche onye zitere m. Nke a bụ uche nke onye zitere m, ka m ghara ịtụfu ihe ọbụla n’ime ihe niile o nyere m, kama ka m mee ka ha si n’ọnwụ bilie n’ụbọchị ikpeazụ.

Nke a bụ uche nke Nna m, ka onye ọbụla hụrụ Nwa ahụ ma kwerekwa na ya, nwee ndụ ebeebe. Aga m akpọlitekwa ya n’ọnwụ n’ụbọchị ikpeazụ.

Igbo Mass readings for April 18 2024, Tọọzde Izuụka nke Atọ n’oge Mbilite n’Ọnwụ Kristi.

Igbo Mass Readings for April 17 2024, Wenezde Izuụka nke Atọ n’oge Mbilite n’Ọnwụ Kristi.

Catholic Sunday and Daily Mass Readings for 2024 (Kindle eBook & Paperback)

X
Scroll to Top
error: Alert: Content is protected !!

Receive Daily Mass Readings and Reflections via Email

You have successfully subscribed to the newsletter

There was an error while trying to send your request. Please try again.

Catholic Lectionary will use the information you provide on this form to be in touch with you and to provide updates and marketing.