Igbo Mass Readings for September 13 2023, Wednezde n’ime Izuụka nke Iri Abụọ na Atọ N’Oge Adanyeghị n’Emume.

Nke a bụ Igbo Mass Readings for September 13 2023, Wednezde n’ime Izuụka nke Iri Abụọ na Atọ N’Oge Adanyeghị n’Emume.

IHE ỌGỤGỤ NKE MBỤ – 3:1-11

Ihe Ọgụgụ e wetara n’akwụkwọozi Pọl degaara Ndị Kolosi

Ọ bụrụ na ụnụ so Kristi bilie n’ọnwụ, na-achọnụ ihe dị n’eluigwe ebe Kristi nọ n’akanri nke Chukwu. Tụkwasịnụ uche ụnụ n’ihe nke dị n’eluigwe, ọ bụghị n’ihe nke dị n’elu ụwa.

N’ihina ụnụ anwụọla n’ebe mmehie dị, e zookwala ndụ ụnụ na Kristi n’ime Chineke. Mgbe Kristi, onye bụ ndụ anyị pụtara ihe, ụnụ onwe ụnụ ga-esokwa ya pụta ihe n’otito.

Meenụ ka ndụ nke anụahụ nke na-achị n’omume ndụ ụwa nwụọ n’ime ụnụ, dị ka ịkwaiko, adịghị ọcha, agụụ mmehie, ọchịchọ ọjọọ, na anyaukwu nke bụ ife arụsị.

N’ihi ihe niile ndị a, iwe Chineke ga-abịakwasa ndị niile anaghị erubere ya isi. Na mbụ, ụnụ bikwaara ndụ dị otu a mgbe ụnụ bi n’etiti ha.

Ma ugbu a, hapụnụ ihe ndị a niile dị ka: iwe, ọnụma, ibu iro, nkwutọ na okwu rere ure na-esi n’ọnụ ụnụ apụta.

Ụnụ agwala ibe ụnụ okwu ụgha, ebe ụnụ yipụrụla mmadụ ochie ụnụ na omume ọjọọ ya niile, bịa yikwasa mmadụ ọhụrụ nke e ji amamihe na-eme ka ọ dị ọhụrụ n’oyiyi nke onye kere ya.

N’ime Kristi, o nweghị ihe dịka ndị Juu mọbụ ndị Grik, ndị e biri ugwu na ndị Skitịa, ndị ohu na ndị nwe onwe ha, kama Kristi bụ ihe niile nọrọkwa n’ihe niile.

ABỤỌMA NA AZỊZA – Ps. 145: 2-3, 10-11, 12-13

Azịza: Onyenweayị na-egosi ihe niile o kere obiọma na ebere.

1. Ụbọchị niile aga m eto gị

Aga m eto aha gị ruo mgbe ebighịebi.

Onyenweanyị dị ukwuu, kwesịkwa inye otito niile,

Ebube ya dị omimi karịkwa nghọta. Azịza

2. Onyenweanyị ihe niile i kere ga-ekele gị,

ndị kwere na gị ga-agọzi gị

Ha ga-ekwupụta ebube nke alaeze gị

Ma kwupụtakwa ịdị ike Gị. Azịza

3. Ka mmadụ niile mata ọrụ ịtụnaanya gị niile.

Na ebube dị elu nke alaeze gị

Alaeze gị ga-adị ebeebe,

ọchịchị gị na-adị na ndụdụgandụ niile. Azịza

MBEKU – 1 Pita 1:25

Alleluia, Alleluia:

Okwu nke Onyenweanyị ga-adigide ruo mgbe ebighịebi. Okwu a bụkwa oziọma ahụ nke a gbasaara ụnụ.

Alleluia.

OZIỌMA – 6:20-26

Ihe Ọgụgụ nke a si n’Oziọma dị asọ nke Luk dere

Jesu lere ndị na-eso ụzọ ya anya sị, “Ngọzi na-adịrị ụnụ bụ ndị ogbenye, n’ihina alaeze Chineke bụ nke ụnụ. Ngọzi na-adịrị ụnụ ndị agụụ na-agụ ugbu a, n’ihina ụnụ ga-eriju afọ.

Ngọzi na-adịrị ụnụ ndị na-akwa akwa ugbu a, n’ihina ụnụ ga-achị ọchị. Ngọzi na-adịrị ụnụ mgbe ndị mmadụ na-akpọ ụnụ asị, mapụ ụnụ n’iwu, kparịkwaa ụnụ, mọbụ tee aha ụnụ unyi dịka ihe arụ, n’ihi Nwa nke mmadụ!

Ñụrịanụ ọñụ mgbe nke a mere wụlikwaanụ elu n’ọñụ, n’ihina ụgwọ ọrụ ụnụ buru ibu n’eluigwe; n’ihina otu a ka ndị nna ha mere ndị amụma.

Ma ahụhụ ga-adịrị ụnụ ndị ọgaranya, n’ihina ụnụ enwetala nkasịobi. Ahụhụ ga-adịrị ụnụ ndị afọ jurula ugbu a, n’ihina agụụ ga-agụ ụnụ.

Ahụhụ ga-adịrị ụnụ ndị nọ n’ọchị ugbu a, n’ihina ụnụ ga-eru ụjụ beekwa akwa. Ahụhụ ga-adịrị ụnụ mgbe mmadụ niile na-ekwu iheọma banyere ụnụ, n’ihina otu a ka ndị nna ha siri rafuo ndịamụma ụgha.”

Igbo Mass Readings for September 13 2023, Wednezde n’ime Izuụka nke Iri Abụọ na Atọ N’Oge Adanyeghị n’Emume.