Igbo Mass Readings for October 29 2025, Wednezde Izuụka nke Iri Atọ N’Oge Adanyeghị n’Emume.

Nke a bụ Igbo Mass Readings for October 29 2025, Wednezde Izuụka nke Iri Atọ N’Oge Adanyeghị n’Emume.

IHE ỌGỤGỤ NKE MBỤ – 8:26-30

Ihe Ọgụgụ e wetara n’Akwụkwọozi Pọl degaara Ndị Rom

Otu aka ahụ, Mmụọ Nsọ na-enyere anyị aka n’ime adịghị ike anyị. N’ihina anyị amaghị ka e si ekpe ekpere dịka o kwesịrị. Ma Mmụọ Nsọ n’onwe ya ji ịsụ ude nke ọnụ apụghị ịkọ na-arịọrọ anyị arịrịọ.

Chineke, onye na-enyocha obi mmadụ, amarala ihe Mmụọ Nsọ bu n’uche. N’ihina Mmụọ Nsọ na-arịọrọ ndị nsọ niile arịrịọ dịka Chineke si chọọ. Anyị ma na Chineke na-eme ihe niile maka ọdịmma ndị niile hụrụ ya n’anya bụ ndị Ọ kpọrọ dịka O si chọọ.

N’ihina ndị O buru ụzọ mara, họpụtakwa, O kenyere ha oke dị iche inwe ụdị oyiyi Nwa ya, ka Nwa ya wee bụrụ onye e buru ụzọ mụọ n’etiti ọtụtụ ụmụnna.

Ndị ahụ Chineke buru ụzọ mara, ka Ọ kpọrọ; ndị ahụ Ọ kpọrọ ka Ọ gụrụ na ndị eziomume, ndị ahụ Ọ gụrụ na ndị eziomume ka O nyekwara otito.

ABỤỌMA NA AZỊZA – Ps 13: 4-5, 6

Azịza: Onyenweanyị nchekwube m niile bụ n’ịhụnaanya gị.

1. Lee anya ma za m oku, Onyenweanyị na Chineke m!

Nye m ihe nke Gị, ọdịghị otu a, aga m arahụ ụra nke ọnwụ

Mgbe ahụ onyeiro m ga-ekwu sị, ‘etigbuola m ya,”

Ha ga-enwe añụrị mgbe ha hụrụ na m adaala. Azịza

2. Mana mụ onwe m nwere

nchekwube n’ịhụnaanya gị Onyenweanyị

Ka mkpụrụobi m ñụrịa n’enyemaka nzọpụta gị

Aga m ekwere Onyenweanyị ukwe

Maka iheọma nke O meere m. Azịza

MBEKU – Ps. 147:2, 15.

Alleluịa, Alleluịa:

Jerusalem, toonụ Onyenweanyị, Ọ na-ezipụ okwu ya n’ụwa niile.

Alleluịa.

OZIỌMA – 13:22-30

Ihe ọgụgụ nke a si n’Oziọma dị asọ nke Luk dere.

Jesu na-agagharị n’obodo ukwu na n’obodo nta, na-akụzi nkuzi, ka ọ na-aga Jerusalem. Otu onye jụrụ ya sị, “Onyenweanyị ọ bụ naanị mmadụ olemole ka a ga-azọpụta?”

O wee gwa ha sị, “Gbaanụ mbọ ka ụnụ si n’ụzọ dị warawara banye, n’ihina agwa m ụnụ, ọtụtụ mmadụ ga-achọ ka ha banye, ma ha agaghị enwe ike.

Oge ọbụla onye nwe ụlọ biliri gbachie ọnụụzọ ya, ụnụ ga-amalite iguzo n’ezi na-akụ aka n’ụzọ na-asị, “Dinwenụ megheere anyị ụzọ.”

Ọ ga-aza ụnụ sị, “Amaghị m ebe ụnụ si bịa.” Mgbe ahụ ụnụ ga-ebido na-asị, “Anyị na gị riri, ñụkwaa; ịkụzikwara nkụzi n’ogbe anyị.”

Ma ọ ga-asị, “Agwa m ụnụ, amaghị m ebe ụnụ siri bịa. Sinụ n’ebe m nọ pụọ, ụnụ niile bụ ndị omenjọ!”

N’ebe ahụ ụnụ ga-akwa akwa, na-ata ikikere eze; mgbe ụnụ hụrụ Abraham, Aịzik na Jekọb na ndị amụma niile ka ha nọ n’alaeze Chineke.

Ma ụnụ onwe ụnụ ga-abụ ndị a chụpụrụ n’ezi. Ndị mmadụ ga-esi n’ọwụwa anyanwụ na ọdida anyanwụ, sikwa n’ugwu na ndịda, bịa nọdụ n’oche nri n’Alaeze Chineke.

Ma lee, ụfọdụ ndị ikpeazụ ga-ebu ụzọ, ụfọdụ ndị bu ụzọ ga-ekpe azụ.

Igbo Mass Readings for October 29 2025, Wednezde Izuụka nke Iri Atọ N’Oge Adanyeghị n’Emume.