Igbo Mass Readings for August 16 2023, Wednezde n’ime Izuụka nke Iri na Itoolu N’Oge Adanyeghị n’Emume.

Nke a bụ Igbo Mass Readings for August 16 2023, Wednezde n’ime Izuụka nke Iri na Itoolu N’Oge Adanyeghị n’Emume.

IHE ỌGỤGỤ NKE MBỤ – 34:1-12

Ihe Ọgụgụ e wetara n’akwụkwọ Diuterọnọmi

Mosis wee si n’ala dị larịị nke Moab rịgoro ugwu Nebo, nke dị n’elu ugwu Pisga n’ọwụwa anyanwụ obodo Jeriko.

Yahweh siri ebe ahụ gosi ya ala ahụ niile: site n’oke ala Giled, lere anya n’ụzọ ugwu, ruo obodo Dan. Ọ hụkwara oke ala Naftali niile na oke ala Ifrem na Manase, na oke ala Juda, lere anya ụzọ ọdịda anyanwụ ruo osimiri Mediterenia.

O sitekwara n’akụkụ ndịda ala Juda, lere anya ruo ndagwurugwu ahụ sitere na Zoa ruo Jeriko, nke a na-akpọ obodo nkwụ!.

Mgbe ahụ Osebụrụwa gwara Mosis, “Nke a bụ ala ahụ nke m kwere Abraham, Aịzik na Jekọb nkwa inye ndị agbụrụ ha niile. Lee, emeela m ka iji anya gị abụọ hụ ya.

Ma ịgaghị aba n’ime ya.” N’ihi ya Mosis nwodibo Chineke, wee nwụọ n’ebe ahụ n’ala Moab, dịka Yahweh kwuru. Yahweh liri ya n’otu ndagwurugwu dị na Moab nke chere obodo Betpeo ihu.

Ma o nweghị onye ma ebe ili Mosis dị ruo taa. Mosis gbara otu narị afọ na iri abụọ mgbe ọ nwụrụ. N’oge ahụ, ahụ siri ya ike. Ọ ka na-ahụkwa ụzọ nke ọma.

Ụmụ Izrel ruru ụjụ maka ọnwụ Mosis iri abalị atọ n’ala dị larịị nke Moab. Mgbe ahụ, Joshua nwa Nọn jupụtara na mmụọ nke amamihe n’ihina Mosis bikwasara ya aka n’isi họpụta ya ka ọ bụrụ onye ga-anọchi ya.

Ụmụ Izrel rubeere Jọshụa isi, dobe ihe niile Yahweh nyere Mosis n’iwu. Kamgbe ahụ, o nwebeghị onye amụma ọzọ biliri n’Izrel dịka Mosis onye ya na Yahweh kparịtara ụka ihu na ihu.

O nweghịkwa onye amụma ọzọ rụrụ ụdị ọrụ ịtụnaanya na ọrụ ebube niile, nke Chineke zijere Mosis ka ọ rụọ, megide eze ljipt na ndị ọrụ ya niile, na ndị ala ya niile.

O nweghịkwa onye amụma ọzọ rụrụ ụdị ọrụ dị ike, na ọrụ niile dị egwu, nke Mosis rụrụ n’ihu ndị Izrel niile!

ABỤỌMA NA AZỊZA – Ps. 66: 1-3, 5, 8, 16-17

Azịza: Ngọzi dịrị Chineke onye nyere mkpụrụobi m ndụ!

1. Tikuenụ Chineke mkpu ọñụ ụwa niile

tierenụ aha ya dị otito egwu

jirinụ ịja mma ụnụ nye ya otito

Sịnụ Chineke, lee ka I si dị oke egwu! Azịza

2. Bịa lee ọrụ ịtụnaanya Chineke rụrụ,

O kwesịrị ịtụ egwu n’ihi ọrụ ya n’etiti ụmụ mmadụ

Ụnụ mba niile gọzienụ Chineke anyị,

meenụ ka otito ya gbasaa n’ụwa niile. Azịza

3. Bịanụ gee ntị ụnụ niile na-atụrụ Chineke egwu,

ka m na-akọrọ ụnụ ihe o mere m

Oge m bekuru ya,

ukwe otito dịkwa m n’ire. Azịza

MBEKU – Ps 111:8

Alleluia, Alleluia:

Iwu gị dị ntụkwasịobi n’ụzọ niile nke a mere ka ọ dị ebeebe ebebe.

Alleluia

OZIỌMA – 18:15-20

Ihe Ọgụgụ nke a si n’Oziọma dị asọ nke Matiu dere

Jesu gwara ndị na-eso ụzọ ya sị, “Ọ bụrụ na nwanne gị emejọ gị, gaa gwa ya mmehie ya n’ebe naanị gị na ya nọ. Ọ bụrụ na ọ ñaa gị ntị, iritela nwanne gị ahụ n’uru.

Ma ọ bụrụ na ọ ñaaghị gị ntị, kpọrọ otu onye mọbụ mmadụ abụọ gakwuru ya, ka okwu ọbụla bụrụ nke mmadụ abụọ mọbụ atọ ga-agba akaebe banyere ya.

Ọ bụrụ na ọ ñaghị ha ntị, gwa ndị nzukọ, ma ọ bụrụkwanụ na ọ ñaghị ọbụladị ndị nzukọ ntị were ya ka onye mba ọzọ mọbụ ka onye ọnaụtụ.

Ana m agwa ụnụ eziokwu, ihe ọbụla ụnụ ga-eke agbụ n’elu ụwa a, a ga-ekekwa ya n’eluigwe. Ihe ọbụla ụnụ ga-atọpụ n’elu ụwa a, a ga-atọpụkwa ya n’eluigwe.

Ọzọ agwa m ụnụ ọ bụrụ na mmadụ abụọ n’ime ụnụ ekwekọrịta n’ihe ọbụla ha na-arịọ n’elu ụwa, Nna m nke bi n’eluigwe ga-emere ha ya.

N’ihina ebe mmadụ abụọ mọbụ atọ zukọtara n’aha m, ebe ahụ ka m nọ n’etiti ha.

Igbo Mass Readings for August 16 2023, Wednezde n’ime Izuụka nke Iri na Itoolu N’Oge Adanyeghị n’Emume.