Igbo Mass Readings for February 22 2023, Wednezde Ntụ

Nke a bụ Igbo Mass Readings maka February 22 2023, Wednezde Ntụ.

IHE ỌGỤGỤ NKE MBỤ – 2:12-18

Ihe Ọgụgụ e wetara n’Akwụkwọ onye Amụma Juel

“Ma ọbụladị ugbu a “Osebụrụwa na-ekwu, “Laghachikwutenụ m n’ibu ọnụ, ibe akwa nakwa iru ụjụ. Dọkaanụ obi ụnụ, ọ bụghị uwe ụnụ.” Bịaghachinụ azụ n’ebe Osebụrụwa Chineke ụnụ nọ, n’ihi na ọ dị ebere nweekwa obiọma.

Ọ naghị ewe iwe ọsọsọ kama O jupụtara n’ịhụnaanya dị ọkpụ na-atụgharịkwa obi ya wee hapụ ahụhụ ọ chọrọ ịta ndị nke ya. Onye maara ma ọ gaghị alọghachite azụ bịa tụgharịa obi were hapụrụ anyị ngọzi ya kwe ka e weta onyinye mkpụrụ akụkụ na mmanya maka Yahweh Chineke ụnụ?

Gbuonụ opiike na Zayọn. Maanụ iwu ibu ọnụ, nweenụ ọgbakọ dị nsọ. Kpọkọtanụ ndị mmadụ niile, doonụ ọgbakọ ahụ asọ, kpọkọtanụ ndị okenye na ụmụaka, ọbụladị ndị ka na-añụ ara. Ka nwoke lụrụ nwaanyị ọhụrụ hapụ ụlọ ya, ka nwaanyị ya hapụkwa ụlọ ndina ya.

Ka ndị nchụaja ndị na-agba odibo n’ihu Chineke nọrọ n’etiti ụlọnsọ bee akwa sị: “Zọọ ndị nke gị O Osebụrụwa, ekwela ka ihe nrite gị bụrụ ihe ọchị na ihe asịrị nye mba niile. Kedụ ihe mba ndị ọzọ ga-eji jụọ sị: “Olee ebe chi ha nọ?”

Mgbe ahụ Yahweh kwobere ekworo maka ala ya, meekwara ndị nke ebere.

ABỤỌMA NA AZỊZA – Ps. 51: 3-4, 5- 6,12-13,14,17.

Azịza: Biko Onyenweanyị, meere anyị ebere n’ihi na anyị emela njọ.

1. Meere m ebere O Chineke site n’ịhụnaanya gị,

Site na nnukwu obi ebere gị hichapụ njọ m niile,

Sachapụ mmehie m niile,

wụchapụ m na njọ. Azịza

2. N’ihi na amarala m mmehie m niile,

njọ m nọ na mmụọ m oge niile.

Ọ bụ sọ gị, naanị gị ka m mere njọ megide,

ihe dị njọ n’ihu gị ka m mere. Azịza

3. Chineke, kenye obi dị ọcha n’ime m,

Tinye n’ime m mmụọ ọhụrụ na nke siri ike.

Achupụkwala m n’ihu gị.

Anapụkwala m mmụọ nsọ gị. Azịza

4. Nyeghachikwa m añụrị nke nzọpụta gị,

were ezi mmụọ gị chedo m.

Onyenweanyị meghee egbugbere ọnụ m

ka ọnụ m wee kwupụta otito gị. Azịza

IHE ỌGỤGỤ NKE ABỤỌ – 5:20-6:2.

Ihe Ọgụgụ e wetara n’Akwụkwọozi nke Abụọ Pọl dị asọ degaara ndị Kọrịnt

Anyị bụ ndị nnọchite anya nke Kristi. Chineke sitere n’ime anyị na-akpọ ụnụ oku. Anyị na-arịọ ụnụ n’aha Kristi ka ụnụ na Chineke dịkwa na mma ọzọ.

Ọ bụ n’ihi anyị ka Chineke jiri mee ka Kristi, were ọnọdụ na ahụhụ dịịrị ndị mmehie ebe o meghị njọ ọbụla, Chineke mere nke a ka anyị wee bụrụ ndị eziomume nke ya n’ime Kristi.

Ebe anyị na Chineke na-arụkọ ọrụ, anyị na-arịọ ụnụ ka ụnụ ghara ịnabata amara Chineke dịka ihe efu. N’ihina o kwuru sị, N’oge nnabata anụrụ m olu ụnụ, N’ụbọchị nzọpụta enyekwara m ụnụ aka.” Lee, ugbu a bụ oge nnabata, ugbu a bụkwa oge nzọpụta ahụ.

MBEKU – Juel 2: 12-13

R/ Otito na ebube dịrị Gị, O Dinwenụ, Jesu Kristi.

Bịaghachinụ azụ n’ebe Osebụrụwa Chineke ụnụ nọ, n’ihi na ọ dị ebere nweekwa obiọma.

R/ Otito na ebube dịrị Gị, O Dinwenụ, Jesu Kristi.

OZIỌMA – 6:1-6, 16-18.

Ihe Ọgụgụ e wetara n’Oziọma dị asọ nke Matiu dere

Jesu gwara ndị na-eso ụzọ ya sị: “Kpacharanụ anya ime eziomume naanị ka ndị mmadụ wee hụ ụnụ, n’ihi na ụnụ mee otu a, Nna ụnụ nke bi n’eluigwe agaghị akwụ ụnụ ụgwọ ọrụ.

Ya mere mgbe ọbụla ụnụ na-enye onyinye, ụnụ afụla opi dịka ndị ihu abụọ si eme n’ụlọ nzukọ ha, na n’okporo ụzọ niile, ka ndị mmadụ wee too ha. N’ezie, agwa m ụnụ, ha anatala ụgwọ ọrụ ha.

Mgbe ọbụla ị na-enye onyiye ebere, ekwela ka aka ekpe gị mata ihe aka nri gị na-eme; Ka o wee bụrụ ihe i nyere na nzuzo, Nna ụnụ nke na-ahụ na nzuzo ga-akwụghachi ụnụ ụgwọ.

“Mgbe ọbụla ụnụ na-ekpe ekpere, ụnụ emekwala ka ndị ihu abụọ, n’ihina ọ na-amasị ha ịkwụrụ ma na-ekpekwa ekpere n’ime ụlọ nzukọ na n’akụkụ okporo ụzọ niile, ka ndị mmadụ wee hụ ha.

N’ezie agwa m ụnụ, ha anatala ụgwọ ọrụ ha. Ma mgbe ọbụla ụnụ na-ekpe ekpere, banyenụ n’ime ụlọ ụnụ, mechie ụzọ, kpeere Nna ụnụ nke nọ na nzuzo.

Nna ụnụ nke na-ahụ na nzuzo ga-akwụghachi ụnụ ụgwọ. “Ọzọkwa mgbe ọbụla ụnụ na ebu ọnụ, ụnụ agbarụla ihu ụnụ dịka ndị ihu abụọ si eme, ha na-agbarụ ihu ha ka ndị mmadụ wee hụ na ha na-ebu ọnụ.

N’ezie agwa m ụnụ, ha anatala ụgwọ ọrụ ha. Ma mgbe ọbụla ị na-ebu ọnụ, tee ude n’isi, sakwaa ihu gị, ka a ghara inwe onye ga-amata na ị na-ebu ọnụ karịa sọ Nna gị nke na-ahụ ihe niile e mere na nzuzo. Nna gị nke na-ahụ ihe niile e mere na nzuzo ga-akwụ gị ụgwọ.

Igbo Mass readings for February 23 2023, Tọọzde na-eso Wednezde Ntụ.

Igbo Mass Readings for February 22 2023, Wednezde Ntụ.