Igbo Mass Readings for August 22 2024, Ncheta Ịbụ Ezenwaanyị nke Marịa.
Nke a bụ Igbo Mass Readings for August 22 2024, Ncheta Ịbụ Ezenwaanyị nke Marịa.
IHE ỌGỤGỤ NKE MBỤ – 9:1-6
Ihe Ọgụgụ e wetara n’akwụkwọ Onye Amụma Aịzaya
Na mgbe gara-aga, o mere ka e lelia ala Zebulum na ala Naftali, mana n’oge na-abịanụ ọ ga-akwanyere ndị niile bi n’ụzọ nke oke osimiri ugwu; ala nke dị n’ofe Jọdan, Galili nke mba ụwa niile.
Ndị na-aga ije n’ọchịchịrị ahụla nnukwu ihe; Ndị bi na ndo nke ọnwụ, ihe achakwasala ha. I meela ka ndị bi n’obodo ahụ bawanye n’ọnụọgụgụ; i mekwaala ka añụrị ha dị ukwuu;
Ha ga-enwe añụrị n’ihu gị dịka ha si enwe ọñụ n’oge owuwe ihe ubi, ya na otu ndị mmadụ si enwe ọñụ mgbe ha na-eke ihe ha lụtara n’agha. Ị kụjiela ịnyagba na-anyịgbu ya, na mkpara nke a na-akụ ya n’ubu, na mkpara igwe nke ndị na-emesi ya ike, dịka ọ dị n’ụbọchị nke ndị Midian.
Akpụkpọ ụkwụ ọbụla ndị agha ji zọpịasịa ihe n’ọgbọ agha ma uwe a tụrụrụ na ọbara, ha niile ga-abụ ihe agbara ọkụ. N’ihina amụpụtaara anyị otu nwa, e nyekwara anyị otu nwa nwoke; ọchịchị ga-abụkwa nke ya, aha a ga-akpọkwa ya bụ “Onye ndụmọdụ dị ebube, Chineke nke bụ dike, Nna dị Ebeebe, Eze nke udo.”
ABỤỌMA NA AZỊZA – Ps: 112: 1-2, 3-4, 5-6, 7-8.
Azịza: Añụrị na-adịrị onye na-atụrụ Onyenweanyị egwu, onye ji ọñụ na-edebe iwu ya.
1. Alleluia! Añụrị na-adịrị onye na-atụrụ Onyenweanyị egwu,
onye ji ọñụ na-edebe iwu ya!
Ụmụ onye dị otu a ga-abụ ndị nwere ike n’ụwa,
agbụrụ onye ezigbo omume ga-enweta ngọzi. Azịza
2. Ezinụụlọ ya ga-enweta akụnụụba,
eziomume ya agaghị enwe mgbanwe
N’ihina onye ezigbo omume ga-achawapụta
dịka ihe n’etiti ọchịchịrị
ọ dị ebere, ịhụnaanya na-akwụba aka ọtọ. Azịza
3. Ya bụ ezigbo mmadụ anaghị ana ọmụrụnwa ma o binye ego,
ọ bụ onye eziokwu n’ihe niile ọ na-eme.
Ebe eziomume chedoro ya, ọ na-enwe ịkwụdosiike,
ọ na-ahapụ ncheta ga-adị ebeebe n’azụ ya. Azịza
4. Ebe obi ya na nchekwube ya dị n’Onyenweanyị
ọ gaghị atụ egwu ịnata ozi ọjọọ.
O ji ntachi obi emeri egwu ya,
n’ikpeazụ ọ na-emeri ndịiro ya. Azịza
MBEKU
ALLELUIA, ALLELUIA:
Mmụọọma ahụ bịakwutere Marịa sị ya, “Ekele, i jupụtara na grasịa, Osebụrụwa nọnyere gi”.
ALLELUIA.
OZIỌMA – 1: 26-38.
Ihe Ọgụgụ e wetara n’Oziọma dị asọ nke Luk dere
N’ọnwa nke isii, Chineke zigra Mmụọọma Gebrel ka ọ gaa n’obodo Galili a na-akpọ Nazaret; ka ọ gakwuru otu nwaagbọghọ na-amaghị nwoke, onye ikwunibe ya kwekọrịtara na otu nwoke aha ya bụ Josef, nke si n’agbụrụ Devid, ga-alụ.
Aha nwaagbọghọ ahụ bụ Marịa. Mmụọọma ahụ bịakwute Marịa sị ya, “Ekele, i jupụtara na grasịa, Osebụrụwa nọnyere gị!” Obi lọrọ ya mmiri nke ukwuu n’ụdị ekele a, nke mere na ọ malitere ịtụle n’uche ya ihe ụdị ekele a pụtara. Mmụọọma ahụ sịrị ya, “Atụla egwu, Marịa, n’ihina ị natala ngọzi n’aka Chineke.
Lee, ị ga-adị ime, mụta nwa nwoke; aha ị ga-akpọ ya bụ Jesu. Ọ ga-adị ukwuu, a ga-akpọkwa ya nwa onye kacha elu. Dinwenụ Chineke ga-enye ya ocheeze nna ya Devid.
Ọ ga-achị ezinụụlọ Jekọb ebeebe, ala eze ya agaghị enwe ọgwụgwụ.” Marịa jụrụ Mmụọọma ahụ sị, “O lee otu nke a ga-esi mee ebe ọ bụ na-amaghị m nwoke.
Ma Mmụọọma ahụ zara ya sị, “Mmụọ Nsọ ga-abịakwasa gị; ike nke onye kacha elu ga-ekpuchi gị. N’ihi nke a, a ga-akpọ nwa ahụ Ị ga-amụ; Onye nsọ, nwa Chineke.
Lee Elizabet onye ikwu gị, onye ndị mmadụ na-akpọ nwaanyị aga, atụrụla ime n’agadi ya; ugbu a ọ dị ime ọnwa isii. N’ihina ebe Chineke nọ, ọ nweghị ihe nyịrị omume.”
Marịa kwuru sị, “Lee, abụ m odibo nwaanyị nke Osebụrụwa, ka o reere m ka i siri kwu.” Mmụọọma ahụ wee si n’ebe ọ nọ pụọ.
Igbo Mass readings for August 23 2024, Fraịde Izuụka nke Iri Abụọ N’Oge Adanyeghị n’Emume
Igbo Mass Readings for August 22 2024, Ncheta Ịbụ Ezenwaanyị nke Marịa.